Chançon royal 54 : Qu’est devenu Devid et Salemon (CCCLXVIII)
Autre Balade
Qu’est devenu Devid et Salemon[1],
Mathussalé, Josué, Machabee,
Olofernes, Alixandre et Sanson,
Julles Cesar et Hector et Pompee ?
5 Ou est Crises a tout [2] sa renommee,
Artus li roys, Godeffroy, Charlemaine,
Daires li grans, Hercules, Tholomee ?
Ilz sont tous mors, ce monde est chose vaine.
Qu’est devenuz Denys[3], le roy felon,
10 Job le courtois, Thobie et leur lignee[4],
Aristote, Ypocras et Platon,
Judith, Hester, bonne Penelopee,
Royne Dydo, Pallas, Juno, Medee,
Guenievre, Yseult et la tresbelle Helaine [5],
15 Palamides, Tirstan a tout s’espee ?
Ilz sont tous mors, ce monde est chose vaine.
Ou est aléz Lancelot au cuer bon
Et[6] Theseus qui la mer a[7] cerchee,
Dyomedes[8] ? Qu’est devenu Jason
20 Qui en Colcos prist la toison doree,
Et Romulus qui a[9] Romme fondee,
Roy[10] Salhaldin qui tant pouoit[11] de paine,
Bon Sarrazin, et[12] toute leur armee ?
Ilz sont tuit mort, ce monde est chose vaine.[13]
25 Ou est cellui qui conquist Arragon ?
Ou est Clovis et le roy Mrovee ? 123d
Ou est cellui qui fonda Avignon,
Qui fist Paris ou elle est situee,
Reins ou Rouen ? Leur fin est tremuee.
30 Nulz homs ne puet avoir vie certaine
Pour sens qu’il ait ne finance amassee,
Ilz sont tuit mors, ce monde est chose vaine.[14]
Bienfait s’en va o l’ame[15], et le renom
Si demourra exemple a la lignee.
35 Li[16] dessus dit n’orent autre guerdon[17],
Ne li present n’aront autre souldee
Au mieulx venir. Pour ce est trop[18] fol qui bee
A[19] faire rien qui soit chose villaine.
Remembrons nous de la gent cy nommee :
40 Ilz sont tuit mort, ce monde est chose vaine.
L’envoy
Prince[20], au jour d’uy est foleur si montee,
Oultrecuidance, avarice l’enflee,
Que presque[21] tuit en[22] ont la panse plaine,
Tant qu’a[23] mourir n’ont nulle foiz pensee.
45 Or faisons bien, celle gent est finee.
Ilz sont tuit mort, ce monde est chose vaine.
[1] Ms. Ashburnham Salmon
[2] Ms. Ashburnham Ulixes et t.
[3] Ms. Ashburnham Herode
[4] Ms. donnee corrigé d’après le ms. Ashburnam
[5] Ms. Ashburnham Guenevievre aussi la tresnoble Helaine
[6] Ms. Ashburnham Ne
[7] Ms. Ashburnham ot
[8] Ms. Ashburnham Dyogenéz
[9] Ms. Ashburnham ot
[10] Ms. Ashburnham Et
[11] Ms. Ashburnham prenoit
[12] Ms. Ashburnham a
[13] Ms. Ashburnham Ils sont tous mors, c’est chose trop certaine.
[14] Ms. Ashburnham Ils sont tous mors, c’est chose trop certaine.
[15] Ms. Ashburnham on claime
[16] Ms. Ashburnham Les
[17] Ms. guerredon
[18] Ms. Ashburnham trop mq.
[19] Ms. Ashburnham De
[20] Ms. Princes
[21] Ms. Ashburnham puisque
[22] Ms. nen
[23] Ms. Ashburnham Et a
