Chançon royal 52 : De jour en jour va en diminuant (CCCLXVI)
Autre Balade
De jour en jour va en diminuant
De ce monde la revolucion,
Et les estas vont en continuant
De mal en pis a leur destruccion.
5 Les elemens causent confusion,
Nature en soy trop fort se diminue,
Tout de destruit. En la conclusion 122d
Riens estable ne say dessoubz la nue.
Au commencier fu tout en Orient,
10 La clergie, la dominacion.
Puis descendi et vint en Occident,
Ou moult a eu de consolacion.
Aprés leurs bien vient grant mutacion,
La chose yra dont elle estoit venue.
15 Brief se fera grant renovacion :
Riens estable ne sçay dessoubz la nue.
Son tour a fait le cercle en descendant,
Qui a couru par mainte region,
Or s’en reva monter en bastendant
20 Tant par midy com par septentrion.
La se traira toute la mocion
Au premier lieu qui long temps l’a tenue,
Ou ja pieça fait preparacion :
Riens estable ne say dessoubz la nue.
25 Les Grieux furent jadis fort et puissant,
Alixandre en fait ostension.
Et les Hebrieux, Machabee vaillant.
Puis aux Rommains vint la possession
D’armes sure, et a leur dicion
30 Tout sousmistrent le monde en leur venue,
Qui a present sont a perdicion :
Rien[s] estable ne say dessoubz la nue.
Aux Gaulx aprés vint vaillance en present,
Tesmoing Charles, Godeffroy de Bullion.
35 Puis s’en ala de soy faire un present
A ceulx de Bruth en l’ille d’Albion.
En retournant quiert autre nacion,
Honneur s’enfuit, le cours du temps se mue.
Jugéz sur ce qu’a mon opinion
40 Riens estable ne sçay dessoubz la nue.
L’envoy 123a
Princes, trop va nature en defaillant.
Il n’est petit fors que chetive gent,
Et la terre est de povre revenue.
Le monde est viel, ne veult qu’or et argent.
45 Signe st mortel, tout se va corrompant :
Riens estable ne sçay dessoubz la nue.