Chançon royal 51 : Selon raison, il n’est nulle science (CCCLXV)
Autre Balde
[1381]
Selon raison, il n’est nulle science
Qu’il ne conviengne [a] experimenter
Mais en tous cas a lieu experiance,
Et je le puis clerement demonstrer :
5 Qu’uns clers nouviaulx n’oseroit entamer
Plait pour autrui jusque il ait bien l’usaige,
Et uns homs lays l’ose bien demener :
A l’[omme] expert creéz, ce dit le saige.
Depuis qu’Adam fist l’innobedience
10 Dont Dieux le voult de paradis getter,
Yssi de lui peuple en grant habondance
Qui xiiii.c. ans pot lors durer.
Mais pour leur mal les fist Dieux definer,
Sauvé[1] Noel, son arche et son parage.
15 Le monde adonc convint[2] renouveller.
A l’[omme] expert creéz, ce dit le saige.
A Abraham plain de grant pacience
Se voult li cours de ce monde muer
En l’aage tiers, par telle continence
20 Sans semblables qu’avéz oy nommer,
Et a tel nombre voult adonc remuer.
Le temps aprés qui ensuit ce voiage
Babyloine voult depuis transmuer.
A l’[omme] expert creéz, ce dit le saige.
25 Jusques a Crist dura celle puissance,
Quatorze cens ans pot l’aage regner,
Mais tout le cours mua a sa naissance 122c
Qu’a celle fin fault le monde imm[u]er.
Treize cens ans .iiii.xx. .i. nomper,
30 Avons de Crist jusque[3] a ce temps sauvage,
Qui en muant voult son cours preparer :
A l’[omme] expert creéz, ce dit le saige.
Par cinq fois est venu la consequence
De ce monde en tel point ruyner :
35 Dix [et] neuf ans nous tiennent en balance,
Si puis asséz par consequent prouver,
Ce nombre emply ou viie miller,
Que le monde muera son estage.
Experiment m’en aprent a parler :
40 A l’[omme] expert creéz, se dit le saige[4].
L’envoy
Princes, Dieux a tout en sa prescience
Et puet muer par nostre obedience
L’estat du temps et nostre fol courage.
Mais petit voy qui a bien faire pense.
45 Le monde est viel qui a sa fin s’avance :
A l’[omme] expert creéz, ce dit le saige.
[1] Ms. Sauf
[2] Ms. commit
[3] Ms. jusques
[4] Ms. lusaige
