Chançon royal 50 : Regnart qui scet du bas voler (CCCLXIV)
Balade
Fable
Regnart qui scet du bas voler
En yver trop grant fain avoit,
Mais viande ne pot trouver,
Dont a bien pou qu’il ne mouroit.
5 Sur la singesse qui gisoit
Va Regnars li malicieux,
Et dit que moult sont gracieux
Ses enfans. Lors prist elle a rire,
Et ot mengier delicieux :
10 Tuit voir ne sont pas bel a dire.
Quant saoulz fu, lors prist a troter,
Et Ysangrin venir le voit,
Qui de fain ne pouoit aler,
Et demande dont il venoit.
15 ― Certes, fist il, je viens tout droit
De bien aise disner tous seulz
Sur la singesse, qui a deux
Singes treslaiz. Aléz y, sire,
De mentir ne soiéz honteux :
20 Tuit voir ne sont pas bel a dire.
Lors dist : ― Me vouléz vous moquer ?
Qui saige est ja ne mentiroit.
O la singesse vois disner.
Et quant la dame l’aperçoit,
25 De ses enfans lui demandoit, 112a
Si dist qu’ains ne vy si hideux.
Sur lui querent celles et seulx,
Mordent et font tant de martire
Qu’a paine eschappa d’entre eulx :
30 Tuit voir ne sont pas bel a dire.
Adonc se prist a cheminer
Ysangrins qui bleciéz estoit,
Et Regnars lui vint demander
Quel[1] viande mengié avoit.
35 ― Helas ! on n’y mengue ne boit,
Dist Ysangrins, li povres leux.
J’ay parlé des maugracieux
Sanz mentir. S’en ont eu tel yre
Qu’arraché m’ont cuir et cheveulx :
40 Tuit voir ne sont pas bel a dire.
Compere, on ne vous puet monstrer
Au jour d’uy nulle rien qui soit.
Le voir fait bon dissimuler,
Folz est qui son amy ne croit,
45 L’en n’use pas par tout de droit.
Le dire voir est moult doubteux,
Mentir n’est pas si perilleux
A la coustume de l’empire.
Par voir dire estes familleux :
50 Tuit voir ne sont pas bel a dire.
L’envoy
Princes, a tout considerer,
Dire voir fait moult a doubter,
Puis qu’avoir et corps en empire.
Pour ce, qui veult vivre et regner, 122b
55 Souffrir fault, mentir et flater :
Tout voir ne sont pas bel a dire.
[1] Ms. Quelle
