Chançon royal 49 : De tressaint lieu et de royal lignee (CCCLXIII)
Autre Balade
De tressaint lieu et de royal lignee,
Pour les humains getter d’adversité,
Vierge treshumble, avant sainte que nee,
Voult le filz Dieu, par sa doulce pité,
5 Pour ton amour, pour nostre humilité,
Descendre en toy et prendre char humaine
Pour racheter la douloureuse paine
Qu’Eve et Adam mistrent ça en arriere
Sur tous leurs fils par la paine[1] villaine,
10 Et pour ce es tu de tous biens tresoriere.
Du Saint Esprit[2] fu ta char obumbree,
Quant Gabriel t’ot Ave recité
En Nazareth. Onques n’en fus cassee,
Ainz euz tousjours pure virginité.
15 En toy tapy toute sa deité
Pour no rachat la vertu souveraine.
Tu respondis : Fiat, d’umble voix saine.
Lors com soleil passe par la voirriere,
Sanz lesion entra en ton demaine,
20 Et pour ce es tu de tous biens tresoriere. 121c
De toy yssi, lumiere enluminee,
Le doulz Jhesus, quant .ix. mois l’euz porté,
Vierge devant et vierge en la portee,
Et vierge aprés que tu l’euz enfant.
25 En Bethleem nasqui en povreté,
Avec les buefs s’umanité demaine.
La fu Orgueil en orguilleuse vaine
Si fort ferus qu’il tresbuscha arriere,
Et fu destruis la peneuse sepmaine,
30 Et pour ce es tu de tous biens tresoriere.
En la croix fu sa sainte char penee
Par faulx Juifs pour prescher verité.
La par sa mort nous fu vie donnee,
Car en mourant nous a tous racheté.
35 Par le saint sanc qui vint de son costé
Fu nostre mort destruite premeraine,
Dieu apaisé, d’Enfer fraint la quintaine,
Quant trois jours ot dormi en sa lumiere,
Ressuscitans par sa puissance plaine,
40 Et pour ce es tu de tous biens tresoriere.
D’enfer getta par sa mort suscitee
Tous ceulx qu’Adam y avoit endebté,
Adam mesmes et Eve en a gettee,
Patriarches, prophetes a plenté,
45 Et les mena en joyeuse clarté.
Par Eve fut no mors dure et soudaine,
Mais par Ave[3] vint la clere fontaine
Qui nous conduit en la joye pleniere.
Marie as nom, estoille tresmontaine,
50 Et pour ce es tu de tous biens tresoriere.
L’envoy
Doulce vierge, humble et benigne clamee, 121d
Qui pour pecheurs es o Dieu couronnee,
Pour tous pecheurs vueilles faire priere
A ton chier filz, que leur ame dampnee
55 Ne soit en fin. Tu en es obligee,
Et pour ce es tu de tous biens tresoriere.
[1] Saint Hilaire corrige enfaute
[2] Ms. esperit
[3] Ms. eve
