Chançon royal 48 : S’Alixandre, le puissant roy paien (CCCLXII)

Balade

                        S’Alixandre, le puissant roy paien,
                        Julles Cesar, Hector et leur effors,
                        David, Josué, Judas Machabeyen,
                        Artus, Charles et Godefroy li fors,
5                      Qui tant d’armes firent tuit de leurs corps
                                    Que preux sont par tout tenuz,
                        Estoient tuit au monde revenuz,
                        Pour faire bien, pris, honeur et vaillance
                        Seront entr’eulx bien améz et venuz
10                    B.[1] du Guesclin, connestable de France.

                        Car, a son temps et par son bon moien,
                        Du royaume mena les Anglés hors.
                        Espaingne en fin conquesta et li sien,
                        Enz ou pais combatit deux foiz lors.
15                    L’une fut prins et, quant il fut ressors
                                    Et de se prinson yssus,
                        Se ralia et remist ses genz sus,                                                           121a
                        Le roy Pietre desconfist par puissance,
                        Henry fist roy et regner par vertus
20                    B. du Guesclin, connestable de France.

                        Canole donc, Granson et Albien
                        Vindrent courir en France, lui dehors,
                        Tout gastoient. Mais, quant il le sceust bien
                        Aprés ala de France li confors,
25                    Li bons Bertrans les a tous prins ou mors
                                    Et leurs chasteaulx combatus,
                        Qu’ilz tenoient, prins et abatus.
                        Aux Normans fist des Anglois delivrance.
                        Celle saison les rent mas et confus
30                    B. du Guesclin, connstable de France.

                        Encor n’est ce de tous ces fais cy rien :
                        Que pot il prendre en Guienne de fors
                        Bien emparéz de pierre et de merrien
                        Et quelz assaulx livroit il par defors !
35                    Rien ne duroit, mais telz fu ses depors
                                    Que toudis en prenoit plus.
                        Il fist estre vaillans les malostrus.
                        Son cry donnoit aux ennemis doubtance.
                        Poitou conquist et nous mist au dessus
40                    B. du Guesclin, connestable de France.

                        Onques telz fais ne firent Troien.
                        Royaumes a conquis, villes et pors.
                        En Arragon fu vaillant crestien.
                        Les montaignes passa de Piéz de Pors.
45                    De batailles soixante est ses tresors,
                                    Rencontres ot plus que nulz,
                        En gaige s’est vaillamment maintenus
                        Et combatus jusques a droite oultrance,
                        A cinquante ans a tous ses fais conclus,
50                    B. du Guesclin, connestable de France.

                        L’envoy

                        Princes, je dy que chevaliers esluz,
                        Qui en pou d’ans a fait tant de vertus
                        Pour son seingeur et a son pays, bien
                        Doit o les preux lieu avoir ancien
55                    Et estre améz de tous et chier tenus.[2]

[1] Ms. Bertran

[2] Saint Hilaire considère cet envoi comme incomplet.