Chançon royal 44 : Tout me doubte, sert, obeist et craint (CCCLVIII)
Autre Balade
Tout me doubte, sert, obeist et craint
En ce monde, fors seule creature.
L’air, la terre, eaue et feu ne se faint
De moy servir, chascun a sa droiture :
5 L’air fait le jour pour labour et pasture,
Et pour repos va la noire nuit querre.
L’eaue decourt pour douce nourreture,
Mais contre moy seulz homs estrive et erre.
Tousjours art feux qui nulle foiz n’estaint,
10 Et le souleil donne sa clarté pure,
Qui touz les fruis a meureté contraint,
Que la terre doit germer par nature.
Elle me sert : les .iiii. temps n’ont cure
De moy troubler, chascuns ensuit son erre,
15 Et leur subgiet sanz pechié ne laidure,
Mais contre moy seulz homs estrive et erre.
Printemps l’erbette a yssir hors contraint,
Esté les fleurs, fueille et toute verdure.
Ly oiselet sont a niger abstraint,
20 Et a louer mon nom qui tousjour dure.
Bestes leurs faons et non pas par ardure
De delecter, fors pour espece[1] acquerre. 119c
A chandelles me sert la nuit obscure,
Mais contre moy seulz homs estrive et erre.
25 De douce eaue et de mer poisson maint,
Li chetif ver viennent de pourreture,
Multiplient, ne chose ne remaint
Sanz obeir a leur propre faicture.
Autompne queult fruiz de douce pasture,
30 Que corps humain doit pour vivre requerre.
Yvers purge les champs par sa froidure,
Mais contre moy seulz homs estrive et erre.
Soubzmis lui ay et soubz ses piéz empaint
Toute chose, tant soit clere ne sure.
35 Je ne l’ay pas de fainte coulour paint,
Ains l’ay formé a ma propre figure,
Et rachaté par mort amere et dure,
Et nulz, fors lui, ne me fait grief ne guerre.
De lui me plaing : rien ne m’a fait injure,
40 Mais contre moy seulz homs estrive et erre.
L’envoy
Homs, pense a toy. Suis ma saincte escripture.
Homs, contre moy plus ne te desnature.
Homs, pour bien mal que jugeras n’enserre[2].
Homs, obeis. Mon saint nom ne parjure.
45 Laisse pechié. Beste son bien procure,
Mais contre moy seulz homs estrive et erre.
[1] Ms. especes
[2] Ms. ne menserre
