Chançon royal 43 : Tuit chevalier et escuier estrange (CCCLVII)
Autre Balade
Tuit chevalier et escuier estrange,
Et tous autres qui tendéz a renon,
Oéz, oéz l’oneur et la louenge,
Et des armes grantdisime pardon.
5 C’est de par le chevalier
A l’aigle d’or, lui .xxxe. a destrier,
D’uns paremens, joustans en sa compaigne,
Et delivrans tous ceuls de leur mestier,
A l’endemain du jour de Magdelaine. 119a
10 A la noble cité, ainsis l’enten ge,
Qui de Paris porte le propre nom.
Royne y aura paree comme un ange,
.xxx. dames d’uns habiz et facon.
D’Isle Celee nuncier
15 Vous fait son nom, le dimanche dancier
Et le lundi jouster a bonne estraine
Tant de lances c’om vouldra emploier,
Au lendemain du jour de Magdelaine.
Le mieulx joustant dehors sanz faire change
20 Aura pour pris chapel d’or bel et bon,
Et de dedenz dyament en losange,
Dont la roine fera present et don.
Et si auront estrangier,
Quinzaine avant et .xv. a repairier,
25 Bon sauf conduit, hors traison villaine.
Ainsi le fait l’aigle d’or publier,
Au lendemain du jour de Magdelaine.
Aprés ce jour tuit escuier se range,
Car le mardi autres joustes raron
30 D’un escuier, lui .xxxe. en sa range,
D’uns paremens seront li compaignon
Pour les rans faire et drecier.
Et damoiselle au gent corps et legier,
Soy .xxxe. d’uns habiz et demaine,
35 Pour les joustants veoir et adviser,
Au lendemain du jour de Magdelaine.
Le mieulx joustant dehors n’aura pas lange,
Mais d’argent fin chapel a son bandon,
Et de dedenz fermail d’or sanz meschange
40 La damoiselle leur donrra, ce dit on.
L’aigle[1] donra a mangier
Lundi au soir et vouldra festoier.
Le noble roy de France aura court plaine
Mardi au soir. La feste a fait crier 119b
45 Au landemain de jour de Magdelaine.
L’envoy
Princes, qui veult les grans fais esploitier
A telz festes se doit lors conseillier
Aux chevaliers. Lors est temps qu’on empraingne
Grosses choses qui a a guerrier.
50 Pour ce, vueilléz sur ces poins advisier,
Au lendemain du jour de Madelaine.
[1] Ms. Laigle dor
