Chançon royal 42 : Sur tous tresors que princes puet avoir (CCCLVI)
Autre Balade
Sur tous tresors que princes puet avoir,
Aprés l’amour de son peuple et des siens,
C’est d’aprandre les livres et sçavoir,
Et de veoir les faiz des anciens.
5 Car la voit il et les maulx et les biens
De cieuls qui ont esté preu, foul ou saige,
Homes failliz et bons victoriens.
Ainsi sur tout puet avoir avantaige.
Et doit adonc les vertus parcevoir
10 Et les vices hair sur toutes riens,
A Dieu servir doit son cuer esmouvoir,
Estre larges de ses biens terriens.
Voy qui tu es et conçois dont tu viens.
Aime les bons et fuy gens de folaige :
15 Qui ces poins fait, ce dit Justiniens,
Ainsis sur touz puet avoir avantaige.
Science vault mieulx que ne fait avoir,
Car tu en puéz aidier toy et les tiens.
Par Salemon le puéz appercevoir :
20 Tholomee, roy des Egypciens,
Fut nobles clers et astronomiens.
Ne pour ce n’ot en lui moins vasselaige[1],
Car roys qui scet et est hystoriens
Ainsis sur touz puet avoir advantaige.
25 Alixandre, qui tant ot de pouoir, 118d
Qui le monde soubmist en ses liens,
D’Aristote voult lettres concevoir,
Tant qu’il fut clerc et rethoriciens.
Charlemaines, li fort roys crestiens,
30 Sçavoit latin, grec et autre langaige,
Dont mieulx valut. Princes qui est sciens
Ainsi sur touz puet avoir avantaige.
Les roys doivent humblement recevoir
Dotrine en eulx de leurs gramariens,
35 Afin que nulz ne les puist decevoir,
Comme firent Atheniensiens.
Philosophes furent roys des paiens :
Roys[2] qui ne scet est comme oisel en caige.
Mais quant il est clers ou bons arciens,
40 Ainsis sur tous puet avoir avantaige.
L’envoy
Prince, je dy et me semble est[re] voir
Que roys qui scet se puet faire valoir
Et soy garder d’avarice et d’oultrage,
Mieulx que celui qui ne veult riens sçavoir.
45 Car, puisqu’il scet et a noble vouloir,
Ainsi sur tous puet avoir avantaige.
[1] Ms. de vaseelaige
[2] Ms. Et roys
