Chançon royal 41 : Helas ! bien doy mon temps plaindre et gemir (CCCLV)r

Autre Balade

                        Helas ! bien doy mon temps plaindre et gemir,
                        Et regreter mon labour et ma vie,
                        Qui oncques jour ne cessay de querir
                        Ce que trouver n’ay peu et ne puis mie,
5                      Et si l’ay quis a Romme, en Lombardie,
                                    En l’empire d’Alemaigne,
                        En Arragon, en Navarre, en Espaigne,
                        De jour en jour ne le faiz que cerchier.
                        Qui la sçaura, pour Dieu, si la m’ensaingne :
10                    C’est Verité, que l’en doit avoir chier.

                        On la m’a fait en la court poursuir
                        En Avignon, mais elle estoit partie.
                        La n’en poy je nulle nouvelle oir.
                        Aprés la quis en Prusse et en Russie,
15                    En maint pais et en mainte abbaye,
                                    En Angleterre, en Behaingne,
                        En Languedoc, en Guyenne, en Champaigne.                                   118d
                        Mais en querrant me dist un charruier :
                        ― Que queréz vous ? Vous perdéz vostre paine.
20                    ― C’est Verité, que l’on doit avoir chier.

                        ― Je ne finay onques de terre ouvrir,
                        Car l’en disoit qu’elle y estoit tapie,
                        Pour lui trover, mais je puis bien fouir,
                        Car pour certain elle s’en est partie,
25                    Et sçay de vray qu’elle est en ciel ravie.
                                    De sa responce mesaingne.
                        N’aiéz paour, il n’est nul qui la prangne[1],
                        Dist le villain, elle vault hault logier.
                        Je voy trop pou qui tel chose entreprangne[2],
30                    C’est Verité, que l’on doit avoir chier.

                        Adonc se va le varlet estourmir,
                        Qui les chevaulx chaçoit de s’escourgie.
                        En moy disant : ― Tu la deusses suir
                        En France droit ou elle est endormie.
35                    S’elle n’y est, quiers la en Picardie,
                                    De l’esveiller te souviengne,
                        Car son dormir tout le monde mehaingne,
                        Si qu’il convient tout honour trebuchier :
                        Mentir, flater fault que la dame estaingne.
40                    C’est Verité, que l’en doit avoir chier.

                        Or suis si las ne me puis soustenir
                        Sanz la trouver, dont je souspir et crie.
                        Et ne la voy de nulle part venir,
                        Ne n’ay espoir que nulz jamais la die.
45                    Helas ! vez ci[3] piteuse maladie,
                                    Dont le povre cuer me saingne.
                        Plus ne querray, au vray Dieu en conviengne !
                        Car sanz lui voy tout perdre et periller.
                        Or n’a nul port : qui est ce qu’est[4] brehaingne ?
50                    C’est Verité, que l’en doit avoir chier.

                        Prince, au jour d’ui voy tout anientir,                                                118e
                        Le voir cesser et regner le mentir,
                        Et tous vices de pluseurs approuchier.
                        Si ne vueil plus celle en terre querir
55                    Qui avec Dieu se veult en ciel tenir.
                        C’est Verité, que l’en doit avoir chier.

[1] Saint Hilaire corrige en praingne

[2] Saint Hilaire corrige en entrepraigne

[3] Saint Hilaire édite vezci

[4] Ms. qui est