Chançon royal 40 : Jeunes justes en tes euvres parfais (CCCLIV)
Autre Balade
Jeunes justes en tes euvres parfais,
Odorans fleur de la virginité,
Homs merveilleus a descripre les fais
Du vray filz Dieu et de sa deité,
5 Nourris ou pis de sa divinité,
Nulz sains ne puet a ta haultesce ataindre.
Estables cuers qui tant as profité,
Soiéz pour nous au jour que l’en doit craindre.
Jhesus li doulz, pour noz pechiéz deffais,
10 Si te monstra grant signe d’amisté.
Tu es tesmoing de son sainctisme lays,
A sa mort fus[1], et pour ta dignité
Euz en garde la flour d’umilité,
La chandelle qui [ne] pourroit estaindre.
15 Tesmoinage portas de verité :
Soiéz pour nous au jour que l’en doit craindre.
Le mort de Dieu vous fut mort pour jamais,
Quant vous veistes sa grant asperité.
Lors de la mort vous fut li glaives fais
20 Qui deux vierges ferit par le costé.
Pour ce a la mort, vous fut le mors osté
Qui corps mortelz fait par son mors destraindre.
En ame et corps fustes ou ciel porté :
Soiéz pour nous au jour que l’en doit craindre.
25 Corps ne doit estre virginaulx[2] punais.
En Ephesum fus de Dieu incité. 118a
En un tombel te virent clers et lays
Ou tu entras, mais la vint tel clarté
Que nulz ne sceut des gens de la cité
30 Ou ton saint corps pot demourer ne maindre,
Fors que Dieu l’a en eternalité.
Soies pour nous au jour que l’en doit craindre.
L’envoy
Glorieus sains, je sanz difficulté
Tieng que tu as touz les sains surmonté,
35 Et que sur tous soit ta puissance graindre.
Or te suppli en saincte charité,
Deffen mon corps de mal, d’iniquité.
Soies pour nous au jour que l’en doit craindre.
[1] Ms. fut
[2] Saint Hilaire corrige en virginaulx ne doit estre
