Chançon royal 39 : Aux champs, aux champs ! Ysséz de vo maison (CCCLIII)
Autre Balade
Aux champs, aux champs ! Ysséz de vo maison,
Vous qui devéz avoir honeur et querre.
Vez ci Apvril et la douce saison
Que l’en se doit ordonner pour la guerre,
5 Et que l’en doit son ennemi requerre,
Et la frontiere tenir
Tant qu’il ne puist en voz marches venir.
Li temps est doulz pour dormir en la plaine,
L’erbette vient pour chevaulx soustenir.
10 Ainsi se doit gouverner capitaine.
Car le temps est atrempéz par raison,
Ne chaut ne froit. Doucement charioz erre
Qui doit mener engins et garnison
Pour les chasteaulx son ennemi conquerre.
15 De ses amis doit un chascun pourquerre,
Des que l’iver voit fenir,
Ses aliéz en amour maintenir,
Et de ses gens faire grosse compaignie, 117d
Et souldoiers payer et retenir.
20 Ainsi se doit gouverner capitaine.
Arbalestiers doit avoir a foison
Avecques [soy], se par assault acquerre
Veult un chastel, ville ou forte maison.
Mineurs avoir, et doit souvent enquerre
25 De l’ennemi, quel part il vient ou terre,
Pour son fait rompre et perir.
Et bons chevaulx doit avoir pour courir
Et descouvrir plat pais ou montaigne.
A son dessus doit combatre et ferir :
30 Ainsi se doit gouverner capitaine.
En vostre ost n’ait nulle division,
Soient voz cuers ferméz a une serre,
Briefs en consaulx et en conclusion.
Avisé[z] bien le pais et la terre.
35 Croiéz les bons : qui ce ne fait il erre.
Faictes justice tenir,
Et de tout l’ost [et] amer et cremir.
Soiéz humble, vertueus a la paine,
Et li premiers pour les coups departir :
40 Ainsi se doit gouverner capitaine.
Faites le gaing venir tout en un son.
Autrui profit ne vous chaille d’acquerre[1],
Car se seroit honte et confusion :
Soit tout commun : car cilz qui trop fort serre
45 Ne puet ouvrir. Pour ce son bien enserre
Et le fait anientir,
Pour convoiter puet uns homs tout honnir,
Et tout gaingner quant Largesce le maine.
D’Alixandre doit a touz souvenir :
50 Ainsi se doit gouverner capitaine.
L’envoy
Princes, li homs qui veult gens seignourir, 117d
Le sien garder et l’autrui conquerir,
Doit estre bons et que lascheté craingne,
Les bons amer, honourer et chierir,
55 Largesce avoir et tout temps poursuir :
Ainsi se doit gouverner capitaine.
[1] Ms. dacquerir
