Chançon royal 37 : La grant cité et li fleuves confus (CCCLI)
Autre Balade
La grant cité et li fleuves confus
Ganges ou maint convoiteus avarices,
Ou Balthasar fut prins du roy Cyrus,
Enseveliz de tous les mortelz vices
5 Pour lesquelz il fut destruis,
Et sa cité, sont retournéz, ce truis,
En grant orgueil et en elacion,
Car par ce monde asséz comparer puis
Babiloine, qui vault confusion.
10 Par le fleuve[1] est li peuples entendus
Qui tousjours court a touz mondains delices.
Par Balthazar les princes de ça jus
Qui s’endorment es tresors inpropices,
Mais diviser fist depuis
15 Ganges Cyrus et par.iiic. conduis 116d
Lors amenrir son inundacion,
Et prinst adonc, quant li fleuves fut vuis,
Babiloine, qui vault confusion.
Qui est Cyrus ? C’est li Dieux de lassus,
20 Qui ce fleuve divise en .iii. justices :
Faulte de biens, mort et guerre met sus,
<Qui destruiront les gens et leurs malices.>[2]
Lors les prandra, faulx, orgueilleus et nices,
En leurs vielz pechiéz recuis,
25 Les jugera. Es tenebres du puis
Du grant Enfer yert leur dampnacion.
La trouveront et de jours et de nuis
Babiloine, qui vault confusion.
A Nynive, roys, princes, contes, ducs,
30 Aiéz regart, car Dieux est moult propices,
Dont li peuples doit estre confondus
Pour son orgueil et pour ses malefices
Jonas en estoit instruis,
Par lequel Dieu disoit : ― Pour voz ennuis
35 Seréz noiéz et en perdicion.
.xl. jours aprés trouveréz l’uis
Babiloine, qui vault confusion.
[1] Ms. li fleuves
[2] Vers surnuméraire.
