Chançon royal 36 : Sus ! alarme ! ce dist le Mardi Gras (CCCL)

Autre Balade

                        Sus ! alarme ! ce dist le Mardi Gras
                        Au Charnage, nous serons assaillis !
                        Caresme vient. Que ferons nous, helas ?
                        Ce mercredi sera sur la pays,
5                      Dont je voy ja moult de gens esbahis
                        Et qui delaissent beufs, vaiches et moutons,                                   116b
                        Veaulx et aigneaulx, connins, perdriz, chapons,
                        Cerfs et chevreaulx, pors, bieurre, œufs et frommaige,
                        Oes, malars, faisans, grues et paons.
10                    Maudit soit il, et benoit soit Charnage.

                        Caresme met les povres gens au bas,
                        Jeuner les fait et estre mal servis,
                        Et les contraint par griefs labours de bras :
                        Aux et oingnons, huile de chenevis,
15                    Noix moysies, pommes et pain faitis,
                        Leur met devant, herbes, choulx et porgons,
                        Tourteaulx en pot d’orge et de secourgons,
                        Matin lever pour aler en l’ouvraige.
                        Merveille n’est se tel tirant doubtons.
20                    Maudit soit il, et benoit soit Charnage.

                        Artillerie a dedenz ses cabas,
                        Harens puanz, poissons de mer pourris,
                        Puree et poys et feves en un tas,
                        Pommes cuites, orge mondé et ris.
25                    Dieux ! qu’il a fait de mal aux moines gris
                        Et aux Chartreux, maintes religions !
                        Toudis leur fait june et afflictions,
                        Et a pluseurs tenir povre mesnaige,
                        Le ventre enfler souvent par ses poissons.
30                    Maudit soit il, et benoit soit Charnage.

                        Aux bien peuz fait avoir ventres plas,
                        Il vuide ceulx que j’avoie raemplis,
                        Souppe a huile leur donne et l’avenas,
                        Corde leur çaint, trop leur est ennemis,
35                    .vi. sepmaines sera ses sieges mis.
                        Ainsis le fait : en Mars est sa saisons
                        Une foiz l’an. Contre lui nous tenons
                        Vigreusement[1] : May le mettra en caige,
                        Pasques aussi, nous trois le destruirons.
40                    Maudiz soit il, et benoit soit Charnaige.

                        Dieux, qu’il sera le grant sabmedi mas,                                             116c
                        Povres, tristes, honteus et desconfis,
                        Huéz come leux, car le dimanche es plas
                        Yert Charnaige avec ses bons amis.
45                    Harens seront, figues, raisins[2] honnis.
                        Porree au lart, pastéz, la ne faillons,
                        Connins, cabriz, oés, tartres et flaons.
                        Caresme prins tendrons en no servaige.
                        Eschac et mat a ce jour lui dirons :
50                    Maudiz soit il, et benoit soit Charnaige.

                        L’envoy

                        Princes, ce temps paciamment souffrons,
                        Prenons en gré pois, harens, courtillaige.
                        Caresme est brief, nous le desconfirons.
                        Maudiz soit il, et benoit soit Charnaige.

[1] Ms. Vigueureusement

[2] Ms. et raisins