Chançon royal 35 : Combien qu’il soit vray en commun langaige (CCCXLIX)

Autre Balade

                        Combien qu’il soit vray en commun langaige                                   115d
                        Que tuit sommes d’Eve et d’Adam yssus,
                        Toutesvoies le peuple en seignourage
                        Demanda roy au hault roy de lassus,
5                      Pour estre chief en ce monde sa jus.
                        Et Dieu, veans sa fole entencion,
                        Par Samuel fist declaracion
                        Du droit du roy et de sa grant haultesce,
                        Qu’avoir voult lors, et c’est l’inicion
10                    Comment Dieux a confermee noblesce.

                        Saul eslut, le meilleur et plus saige
                        Du peuple adonc de Benjamin venus.
                        Les espaules fut plus hault de corsaige,
                        Du peuple aussi et li meudres tenus.
15                    <Plus dignes sont ceuls de ce noble herage>[1]
                        Samuel l’oint de royal unction,
                        De ce roy vint aux rois succession,
                        Contes et ducs, chevaliers, gentillesce,
                        Dont je feray ci declaracion
20                    Comment Dieux a confermee noblesce.

                        « Vos filz mettra le roy en son servage,
                        Prandra le leur et donnra a ses drus,
                        Et voz filles en son concubinaige
                        Pourra tenir. » La se sont consentus.
25                    Un chevalier entre mil fut eslus,
                        Tout le meilleur par grant discrettion.
                        Sur Israel la generacion
                        Saul regna, qui puis fut pecheresse.
                        Si pouéz veoir par ceste nascion
30                    Comment Dieux a confermee noblesce.

                        Or est tout cler que ce noble linaige
                        Par le monde est en mains lieux espandus :
                        Seignourir doit et par son vasselaige
                        Vices hair et entendre aux vertus.
35                    Par eulx soient les peuples deffendus,                                             116a
                        Et a eulx soit peuple en subjection.
                        Ainsis en fist Dieux confirmacion,
                        Eulz requerans, c’est ce qui trop les blesce,
                        Quant ilz sentent, par telle election,
40                    Comment Dieux a confermee noblesce.

                        Plus dignes sont ceuls de ce noble herage,
                        Par les raisons que j’ay touchié dessus,
                        Que ne sont ceuls qui sont du serf parage.
                        Et il appert, car li doulz roys Jhesus
45                    En lieu roial fut enclos et repeus.
                        En la Vierge prinst incarnacion
                        Humainement pour no redemption.
                        Du roy David vint la doulce fortresce[2]
                        Dont il nasquit : c’est la conclusion
50                    Comment Dieux a confermee noblesce.

                        L’envoy

                        Prince, il n’est nul, tant ait grant heritaige
                        Ne povreté, qui ne vueille en couraige
                        Noble estr faiz et qui n’ait grant liesce
                        D’y advenir, et par ce monstreray je
55                    Qu’ilz ont raison et [tres]grant advantage[3],
                        Comment Dieux a confermee noblesce.

[1] Ce vers, que l’on retrouve à la ligne 41 de la même pièce, rompt ici la construction strophique ; Saint Hilaire préfère laisser le vers manquant.

[2] Ms. forteresce

[3] Saint Hilaire corrige en advantaige