Chançon royal 34 : Aucuns dient que je suis trop hardis (CCCXLVIII)
Autre Balade
Aucuns dient que je suis trop hardis,
Et que je parle un pou trop largement
En reprouvant les vices par mes dis
Et ceulx qui font les maulx villainement.
5 Mais leur grace sauve certainement
Verité faiz en general sçavoir,
Sanz nul nommer fors que generalment,
Que nulz prodoms ne doit taire le voir.
L’en pugnissoit les maufaicteurs jadis
10 Et rendoit l’en partout vray jugement,
Et Veritéz qui vint de paradis
Blasmoit chascun qui ouvroit laidement.
Par ce vivoit le monde honnestement.
Mais nul ne fait fors l’autre decevoir,
15 Mentir, flater, dont je dy vrayement
Que nulz prodoms ne doit taire le voir.
Par pechié voy les grans acouardiz,
Et les saiges gouverner sotement,
Riches avers, larges atruandiz,
20 Nobles villains, jeune gouvernement
Avoir au vieulx et jeunes ensement 115c
D’eulx presumer, car trop cuident valoir.
Se j’en parle, c’est pour enseignement,
Que nulz prodoms ne doit taire le voir.
25 Les mauvés sont blasméz par leurs mesdis
En l’escripture et ou viel testament,
Et pour leurs maulx les dampnent touz edis
Que l’en souloit garder estroictement.
Mais au jour d’ui Verité taist et ment
30 Ce monde cy, qui ne quiert que l’avoir.
Coupable en est qui telz maulx ne reprant :
Que nulz prodoms ne doit taire le voir.
Les bons n’orent pas les cuers effadis
Dont le renom yert pardurablement
35 Qui conquirent terres, villes, pais[1],
Juif, Sarrazin, et crestienne gent,
Qui aux vertus furent si diligent
Que des vices ne vouldrent nulz avoir.
Blasmons les maulx, fi d’or et fi d’argent !
40 Que nulz prodoms ne doit taire le voir.
L’envoy
Princes, je traiz en hault legierement[2],
Sanz nul ferir s’entechiéz[3] ne se sent
Et que sur lui laist mon carrel cheoir,
Dont il se puet garder legierement
45 Par le fuir. Et dy, en concluent,
Que nulz preudoms ne doit taire le voir.
[1] Ms. et pais
[2] Saint Hilaire corrige en hardiement
[3] Saint Hilaire corrige en entechié
