Chançon royal 33 : Le jeudi jour .xx et vii. de novembre (CCCXLVII)

Autre Balade

                        Le jeudi jour .xx et vii[1]. de novembre
                        L’an .m.ccc.iiii^xx. et puis deux,
                        Ot des François le droit chief et maint membre,
                        Charles le roy, qui tant fut courageux,
5                                  En Flandres noble compaigne[2]
                        A Rosebech, en une haulte plaine,
                        Ou Artvelle fut a touz ses Flamens,
                        Quarante mil, la vit on mainte enseigne,                                          115a
                        Qui desconfis furent en pou de temps.

10                    Regner vouloit le peuple foible et tendre.
                        A leur conte furent fel et crueux,
                        Quant son pais ne lui vouloient rendre,
                        Dont hors l’ont mis les villains oultrageux.
                                    Le roy y porta s’enseigne
15                    A .xiiii. ans, la fait qu’en sang se taingne
                        Son oriflambe encontre ceuls de Gans.
                        A l’assembler d’eulx rougist la montaigne.
                        Qui desconfiz furent en pou de temps.

                        Berry, Bourgoingne y fut, dont je me membre,
20                    Bourbon, Marche en Flandres, Bloys et Euvreux,
                        Saint Poul, Coucy, l’admiral avec eulx,
                        […]
                                    Sancerre et ceuls de Bretaingne,
                        Longueville, Picardie et Champaigne,
25                    Sannié, Beauvéz, Dampmartin, les Normans.
                        .xxv^m. Flamens sont mors a paine,
                        Qui desconfis furent en po de temps.

                        La Conversant et Ribedieu, puis prandre
                        Conte Daulphin et Porcien entreulx,
30                    Delabreth, puis a Harecourt descendre,
                        Tonnerre y fut, Brayne, Grantpré, touz ceulx
                                    Et maint autre chevetaine
                        Avec le roy, Laval. Chascun se paine
                        De lui servir, Chalon et autres gens,
35                    Sempy, Torsy, chascun Flamens mehaingne,
                        Qui desconfiz furent en pou de temps.

                        Je ne puis pas en cinq vers tout comprandre,
                        Ne denommer les haulx cuers vertueux,
                        Auxquelz on doit gloire et victoire rendre.
40                    J’escrips les chiefs pour le renom d’iceulx.
                                    Mais tant vueil je bien qu’om taingne
                        Que le lion d’argent sur roge graine,
                        Les mareschaulx, ceulx qui furent chassans,
                        Ont plus d’armes fait sur la gent villaine,                                         115b
45                    Qui desconfiz furent en pou de temps.

                        L’envoy

                        Princes vaillans, bien pert a l’entreprandre,
                        Que leur orgueil avéz tost fait descendre,
                        Voz ennemis conbatuz sur les champs,
                        Yppre, Bruges, Courtray et Gand fait rendre.
50                    Ne prisiéz plus les Flamens ne que cendre,
                        Qui desconfiz furent en pou de temps.

[1] Ms. vii^e

[2] Ms. compaignie