Chançon royal 32 : Jours de pitié est li sains Vendredis (CCCXLVI)
Autre Balade
Jours de pitié est li sains Vendredis,
Ou quel Dieux fist nostre redempcion.
Que nulz pecheurs ne doit estre escondis,
Vraiz repentans, ayans contriction,
5 Recongnoissans ses pechiéz,
Crians merci, en humble cuer fichiéz.
Ainz doit avoir, car ta loy s’i acorde,
Remission, grace et misericorde.
Ly las peuples qui tant avoit mesprins,
10 L’an mil .ccc. de l’Incarnacion
A Montpellier .lxix. et dix,
Ou ilz firent cruele occision
Des gens du roy qui est chiefs
Au duc d’Anjou qui, pour estre vengiéz,
15 Venoit illec, crioient, ou coul la card,
Remission, grace et misericorde.
En ce saint jour ou Dieu fut crucifis,
Vint li clergiéz a grant procession.
Le cardinal d’Albane et les subgis,
20 L’Estude aussi en grant affliction.
Treshumblement, a criz et yeulz moilliéz,
Les consules despouilliéz,
Femmes crians : Fay au peuple et acorde
Remission, grace et misericorde.
25 Par la rue passa la fleur de lis,
Ou il avoit grant lamentacion,
A mil hommes de gens d’armes elis. 114d
Arbalestiers y avoit grant foison.
Li peuples crioit nuz piéz :
30 Princes, pour Dieu, noz meffaiz sont trop griefs.
Oste rigueur, appelle a non concorde
Remission, grace et misericorde.
Des portes ont les clefs en ses mains mis,
De leurs armes firent ostancion,
35 Les gouverneurs furent des lors desmis.
De la cloque qui fist la mocion
Fut li bateaulx destachiéz,
Et au prince par la ville bailliéz,
En suppliant d’eulx faire, se recorde,
40 Remission, grace et misericorde.
De Montpellier fut li peuples contris,
Qui attendoit dure pugnicion.
Leurs pechiéz ont humblement regehis,
Et Dieux leur a faicte remission.
45 Or sont reconciliéz
Par son sergent, qui s’est humiliéz,
Qui ayme paix, et a fait de discorde
Remission, grace et misericorde.
