Chançon royal 17bis : O convoiteux de l’avoir de ce monde (CCCXLV)
Autre Balade[1]
O convoiteux de l’avoir de ce monde,
Que tu ne puéz un certain jour tenir.
Des que tu nais, la mort en toy habonde,
Voy que tu muers et te convient fenir,
5 Or ne scez quant, et sur le mieulx venir
N’as le terme fors que de .lx. ans.
Et si lairas les richesces mourans,
Ou te lairont par fortune de guerre.
Pour quoy veulz tu estre si acquerans ?
10 Toy mort, n’aras fors que .vii. piéz de terre.
Par convoitier voy que guerre se fonde
Entre les roys pour terres acquerir.
Le sang humain font espandre a grant onde,
Les vaillans cuers et le peuple mourir,
15 Clers et marchans, et l’Eglise perir,
Crestienté, freres participans
De foy, de loy, un baptesme prenans,
Pour le vain nom d’autrui pais acquerre.
Desiste toy, tes freres delaissans :
20 Toy mort, n’aras [fors] que .vii. piéz de terre.
Tu qui es faiz a l’assemblance[2] ronde 114b
Du firmament et de Dieu, puéz veir
Que tout crea, et tout homme redonde
A s’ymage. Pour ce doiz tu cremir
25 De deffaire, par convoiteux desir,
Ce qu’il forma a ta forme semblans.
Car les corps mors, les esperis tremblans
Seulent a Dieu de toy vengence querre.
Se tu es bien ces choses ramenbrans,
30 Toy mort, n’ars [fors] que .vii. piéz de terre.
Tu aras bien ta fosse plus parfonde,
Et grant tombel pour ycelle couvrir,
Mais la convient que ton convoiter fonde,
Et des .vii. piéz te fault content tenir,
35 Estre oublié et cendre devenir.
Le nom pervers est au monde manans,
Ton esperit aura divers tourmens.
Pour tes pechiéz seras mis soubz la serre[3]
Des infernaulx. Es tu au monde grans ?
40 Toy mort, n’aras [fors] que.vii. piéz de terre.
Chascuns doubter doit vie et mort seconde,
Et de s’ame lui doit bien souvenir,
Qui tousjours vit, et plustost c’une aronde
Du corps mortel la convient departir.
45 Et lors la faut[4] selon ses faiz merir
Ou bien ou mal, car c’est droiz jugemens.
Roys, faictes paix, ne soiéz guerrians
Sur voste loy aléz payens conquerre,
Car dire puis a chascun des tirans :
50 Toy mort, n’aras [fors] que .vii. piéz de terre.
L’envoy
Prince, et ou est Oliviers et Rolans,
Alixandre, Charles li conquerans,
Artus, Cesar, Edouart d’Angleterre ? 114c
Ilz sont touz mors, et si furent vaillans.
55 Et se tu es bien ce considerans,
Toy mort, n’aras fors que .vii. piéz de terre.
[1] Pièce identique au f° 108 sous le n° CCCXXX
[2] Saint Hilaire corrige en la semblance (mais le texte est identique en CCCXXX).
[3] Ms. lasserre
[4] Ms. fait corrigé d’après CCCXXX.
