Chançon royal 31 : Antre Beau Raym et le parc de Hedin (CCCXLIV)
Autre Balade
Antre Beau Raym et le parc de Hedin,
Ou moys d’aoust qu’om soye les fromens,
M’en aloye jouer par un matin,
Si vi bergiers et bergieres aux champs,
5 Qui tenoient la leurs parliers moult grans.
Tant que Bochiers dist a Margot la Broingne
Que l’en aloit au traictié a Bouloingne,
Et que François et Anglois feront paix.
Elle respont : Foy que doy ma queloingne,
10 Paix n’aréz ja s’ilz ne rendent Calays.
Lors vint avant Berthelot du jardin,
Qui respondit : La paix suis desirans,
Car je n’ose descouchier le matin
Pour les Anglois qui nous sont destruisans.
15 Mais dire oy, il a passé dix ans, 113d
Qu’a leur dessoubz quierent toudis aloingne
Pour mettre sus leur fait et leur besoingne,
Et puis courent le regne a grans eslays.
Maint l’ont veu, et pour ce je tesmoingne :
20 Paix n’aréz ja s’ilz ne rendent Calays.
Aprés parla, par grant courroux, Robin
A Berthelot et lui dist : ― Tu te mens,
Car les François et [les] Anglois enfin
Veulent la paix, il en est des or temps.
25 Trop a duré la guerre et li contens,
Ne je ne voy nul qui ne la ressoingne.
― Certes, tout ce ne vault une escaloingne,
Ce lui respont Henris li contrefais.
Encor faulra chascun [porter] sa broingne :
30 Paix n’aréz ja s’ilz ne rendent Calays.
Car, l’autre jour, oy maistre Martin,
Qui racontait le roy est mendre d’ans.
Et qu’il estoit une loy en latin
Qui deffendoit rien vendre des enfans.
35 En Guyenne son .iim. et cinq cens
Villes, chasteaulx qu’Englés veulent qu’on doingne
En grant tas d’or, et que le roy esloingne
De roy en duc l’ommaige qui est fais.
Qui fera ce ? respon, sote caroingne.
40 Paix n’aréz ja s’ilz ne rendent Calays.
Guichars li bruns, qui fut nez a Seclin,
Dist que cilz faiz est doubteux et pesans,
Voire, et qu’Englés y pensent mal engin,
De retenir ce port qui est constans.
45 Se ce ne fust, bien le fussent rendans.
Mais ilz pensent barat, guerre et alloingne
Faire au derrain : ne le duc de Bourgoingne
Et de Berry ne feroient jamais
Tel paix a eulx. qui voulra me[1] pardoingne :
50 Paix n’aréz ja s’ilz ne rendent Calays. 114a
L’envoy
Princes, la fut Bertrisons et Hersans
Et Alizons, qui moult orent de sens,
Et jugierent, quant li parlers fut fais,
Que telle paix seroit orde et meschans,
55 Et conclurent aux bergiers eulx disans :
― Paix n’aréz ja s’ilz ne rendent Calays.
[1] Ms. si me
