Chançon royal 30 : Il semble a ceuls de cest aage present (CCCXLIII)
Balade
Il semble a ceuls de cest aage present
Qu’il ait en eulx plus honeur et vaillance,
Sens et advis et bon gouvernement,
Bonté, beauté, seignourie et puissance,
5 Subtilité, parfaitte congnoissance,
Qu’il n’ot oncques en noz predecesseurs,
Es anciens, qui, par leurs grans labeurs,
Les royaumes et les terres conquirent,
Et grans citéz fonderent les pluseurs.
10 Ja ne feront les presens ce qu’ilz firent. 113b
Avons nous riens fors que leur remanent ?
Certes, nennil. La dotrine et science
Nous vient d’iceulx tresanciennement,
L’onnour, le bien, la bonne conscience.
15 Ne je ne voy ne sçay d’experience
Un seul qui ait fondé cité ne tours,
Regne conquis, fors que plus grans atours
Courent par tout que noz peres ne virent.
Habis orent ne trop grans ne trop cours.
20 Ja ne front les presens ce qu’ilz firent.
On en treuve qui sont asséz parlant
De ce dont pas bien n’ont la congnoissance,
Et vont entreulx les anciens blasmant.
Mais c’est foleur et grant oultrecuidance,
25 Car leurs faiz sont petiz fors qu’en loquence.
A conquerir est foible leur valours,
Encor perdent leurs terres les meilleurs[1],
Que li prodomme ancien leur acquirent,
Qu’ilz ne scevent garder, c’est grans dolours.
30 Ja ne feront les presens ce qu’ilz firent.
Alixandre conquist tout Orient,
Et le monde subjuga des s’enfance.
Roumains aprés, puis son trespassement,
Le monde orent a leur obeissance.
35 Charles le grant le royaume de France
Tint et acrut, Espaingne a grans sueurs
Conquist aussi, fut chief des empereurs.
Les crestiens fort de lui se sentirent,
Et pour ce sont les anciens greignours.
40 Ja ne feront les presens ce qu’ilz firent.
Larges furent hardi, fort et puissant,
Saige et subtil, non de grant apparance,
De simple habit, et non mescongnoissant,
Le bien commun orent en remembrance.
45 Et les vertus en toute reverence 113c
Furent o eulx sanz querir mauvais tours.
Car foulz deliz ne regnoit a leurs cours,
N’orgueil aussi, par ce riens ne perdirent.
Entendéz bien ça, se vous n’estes sours :
50 Ja ne feront les presens ce qu’ilz firent.
L’envoy
Prince, foul est qui par[o]le a rebours
Des anciens des quelz nous vient l’oneurs[2],
Et les terres que par leurs corps soubzmirent,
Et nous sommes avers, chetis et lours.
55 Donc, qui vient voit et perçoit ces coulours,
Ja ne feront les presens ce qu’ilz firent.
[1] Saint Hilaire corrige en meillours
[2] Saint Hilaire corrige en honours
