Chançon royal 29 : Ou temps jadis, selon les fictions (CCCXLII)
Autre Balade
Ou temps jadis, selon les fictions
Des poetes, que les bestes parloient,
Et les oiseaux, vaches, brebis, moutons,
Cerfs et sangliers, maintefoiz s’assembloient,
5 Asnes, chevauls, et entreulx ordonnoient
Qui bon seroit pour leur nourissement,
Diversement de leurs vivres jugeoient.
Chascun juge selon son sentement.
Car les connins, les lievres, leurs faons,
10 Herbe, lasson, cholz et grain requeroient.
Et les asnes demandoient chardons,
Et les brebis la montaigne vouloient,
Vaiches les prez. les chevaulx demandoient
Avoine et foing, ratelier, logement,
15 Paille et estrain. Cers les tailliz prenoient :
Chascun juge selon son sentement.
Mais les sangliers veulent les fors buissons,
Les glans des boys, bas lieux ou veruilloient.
Et les renars, gelines et chapons,
20 Et les chievres bois et ronses broutoient.
Les loups la char, com larrons, ravissoient.
Lyons, lyeppars firent semblablement.
Ainsis entreulx divers vivres prenoient. 113a
Chascuns juge selon son sentement.
25 Ostours, gerfaulx, sacres, laniers, faucons
Vouldrent les cuers des oiseaulx qu’ilz chaçoient.
Oes, malars, cercelles et hairons,
Sur les estancs et ruisseaulx se vivoient.
Gelines, cogs[1], o les gens habitoient,
30 Pour avoir pain, orge, avoine et froument,
Leurs natures les diversifioient.
Chascuns juge selon son sentement.
Ainsis est il, se bien garde y prenons,
En l’aage humain et des gens quelz qu’ilz soient,
35 Tant au secle comme es religions,
Leurs pensees a divers ars s’arroient.
Pas ne jugent pluseurs si comme ilz doient,
Ne selon droit, mais naturelement
Selon leurs cuers qui ainsi les desvoient.
40 Chascun juge selon son sentement.
L’envoy
Princes, li sens naturelz est tresbons,
Et li acquis vault merveilleusement.
Qui a les deux, il est tressaiges homs.
Chascuns juge selon son sentement.
[1] Saint Hilaire corrige en coqs
