Chançon royal 28 : En une grant fourest et lee (CCCXLI)
Balade
En une grant fourest et lee 112c
N’a gaires que je cheminoie,
Ou j’ay mainte beste trouvee,
Mais en un grant parc regardoye.
5 Ours, lyons et liepars veoye,
Loups et renars qui vont disant
Au povre bestail qui s’effroye :
Sa de l’argent, ça de l’argent !
La brebis s’est agenoillee,
10 Qui a respondu comme coye :
J’ay esté .iiii. fois plumee
Cest an ci, point n’ay de monnoye.
Le buef et la vaiche se ploye :
La se complaingnoit la jument.
15 Mais on leur respont toute voye :
Sa de l’argent, ça de l’argent !
Ou fut tel paroule trouvee
De bestes trop me merveilloie.
La chievre dist lors : ― Ceste annee
20 Nous fera moult petit de joye.
La moisson ou je m’attendoye
Se destruit par ne sçay quel gent.
Merci, pour Dieu, [et] va ta voye.
― Sa de l’argent, sa de l’argent !
25 La truie qui fut desesperee,
Dist : Il faut que truande soye,
Et mes cochons : je n’ay derree
Pour faire argent. ― Ven de ta soye,
Dist li loups, car ou que je soye,
30 Le bestail fault estre indigent.
Jamais pitié de toy n’aroye :
Sa de l’argent, sa de l’argent !
Quant celle raison fut finee,
Dont forment esbahis estoye,
35 Vint a moy une blanche fee,
Qui au droit chemin me ravoye, 112d
En disant : ― Se Dieux me doint joye,
Ces[1] bestes vont a court souvent,
S’ont ce mot retenu sanz joye :
Sa de l’argent, sa de l’argent !
L’envoy
Prince, moult est auctorisee
Et court par tout communement
Ceste paroule acoustumee :
Sa de l’argent, sa de l’argent !
[1] Ms. Sers
