Chançon royal 25 : L’autre jour vi un charruier (CCCXXXIX)
Autre Balade
L’autre jour vi un charruier 111d
Bien pres du pont de Charenton
Charruiant. Lez lui un bergier,
Et, d’autre part, un vigneron,
5 Et aprés vint un bocheron.
Lors se mistrent en un tropel,
Et la saige femme Ysabel
Vint la disant par piteux mos :
L’en m’a fort batu le cervel.
10 Il ne regne au jour d’ui que fols.
Trop voy nature amenuisier :
Enfant ne sont fors qu’avorton.
Quant on les porte baptizer,
A eulx regarder le peut on.
15 ― Par ma foy, dist le bergeron,
Taurastre naissent li aignel.
Les brebis ont rongneuse pel,
Maigres sont et n’ont que les os.
Rien aler ne voy bien ne bel.
20 Il ne regne au jour d’ui que fols.
Adonques parla l’ahannier,
Disans : ― Chascun jour labouron,
Mais la semance du grenier
Ne li germe n’est nul temps bon.
25 Car du froument naist li chardon.
Et le pavot croist du conseel.
La caupetrape naist ou preel,
Et l’ortie est li fruis plus gros.
De mauplant fait chascun troussel :
30 Il ne regne au jour d’ui que fols.
― Vous dictes voir, dist le vignier.
Aux vignes bien l’apercevon.
Le bon plant ne fait que changier :
Gouays devient le morillon,
35 Non pas par deffault de façon,
Mais pour le cours du temps isnel 112a
Qui se tourne comme l’annel
Tousjours en mal. S’est li vins mols.
Tel temps ne fut depuis Abel.
40 Il ne regne au jour d’ui que fols.
Lors dist cilz qui va beschoier[1] :
― Entre nous tuit merveille avon,
Car, quant l’en coupe un cornillier,
Un yf, un chesne, un[2] arbre bon,
45 Es fourests en lieu d’eulx trouvon
Cilz foulz naissans. N’y est pourcel,
Chievre, congnie ne coustel,
Qui en puist asserber les bos.
Partout croissent li grant moncel.
50 Il ne regne au jour d’ui que folz.
L’envoy
Prince, li saige ont grant mestier
A ces cinq pour eulx enseignier
Le bon plant et les bons estos :
Au paistre, vigneron, chartier[3],
55 Boquillon et femme premier.
Il ne regne au jour d’ui que fols.
[1] Saint Hilaire corrige en boschoier
[2] Ms. ou un
[3] Ms. vigneron et charretier
