Chançon royal 26 : Un chien, un chat, un lievre et un conin (CCCXL)
Balade
Un chien, un chat, un lievre et un conin,
Un esprevier, un oisel de riviere,
Et les poissons refusent a l’engin.
Quant prins y sont en aucune maniere,
5 S’ilz eschapent, ilz se traient arriere,
D’y rembatre n’ont nulle fois envie.
Toudis pensent a leur prinse premiere.
Dont est cilz fouls qui deux fois se marie.
Qu’a la premiere a moult paine et hutin
10 D’ostel querir, de querre chamberiere.
Il y fault lart, blef, charbon, buche et vin, 112b
Liz, couvertoirs, linges, draps, robe entiere,
Poz de metail, chauderon et chaudiere,
Femme servir toute nuit anuitie,
15 Ouir ses mos, souffrir sa dure chiere.
Dont est cilz foulz qui deux foiz se marie.
De ses dolours ne puet venir a fin :
Le chertier[1] brait, le bouvier, la bergiere.
Il couche tart, il se lieve matin,
20 Petis enfans lui crint au derriere.
Maigres devient, sa femme lui est fiere.
Quant elle muert, s’il renchiet, c’est folie,
Car jamais jour il n’ara joye entiere.
Dont est cils foulz qui deux fois se marie.
25 Jamais ne deust entrer en ce chemin,
Ne charruier en si parfonde ourniere.
Car de cent un n’y voy pas pelerin
Qui n’y laisse bourdon et alouyere,
Escharpe et tout jusques au cymitiere :
30 C’est un tourment qui abrege la vie.
Li plus jolis s’en met sur la litiere.
Dont est cilz foulz qui deux foiz se marie.
Mais seulz homs est trop plus que beste enclin
A son maleur et sa fin derreniere,
35 Quant il ne fuit de la serpent le crin
Dont soufert a la poison droituriere.
Humble se faint, de copcion legiere,
Au commencier, [certes] n’en doubtéz mie.
Mais elle point quant prins a s’estrayere.
40 Dont est cilz foulz qui deux foiz se marie.
L’envoy
Prince, autant vault d’aler noier en Rin
Que rencheoir en tel forsenerie,
Ou truander au four et au moulin.
Dont est cilz foulz qui deux fois se marie.
[1] Ms. cherretier
