Chançon royal 22 : L’autrier si com je m’en venoie (CCCXXXVI)
Balade
L’autrier si com je m’en venoie
De Busancy, de Setenay,
Oy pluseurs gens en ma voie,
Et sitost que Meuse passay,
5 Uns paisans dist : ― Je ne sçay
Comment on se pourra chevir.
Je voy chevaulx prandre et ravir,
Moutons et aumaille tuer,
Par gens qui nous en font fuir.
10 Ja piet n’en puist il retourner.
L’autre dist : Ce seroit grant joye.
Tout mettent le monde en esmay,
Tasse n’est, bourse ne courroye
Qu’ilz ne visitent, bien le sçay.
15 Cheval, poulain ne jument n’ay,
Huis a brisier, coffre a ouvrir,
Ne drap linge ou l’en puist gesir,
Ne bonne robe a emporter.
Et si m’a l’un voulu ferir :
20 Ja piet n’en puist il retourner.
― Quel part vont il ? Qui les convoie ?
Qui sont ilz ? ― Je le te diray.
C’et des gens au roy Rabajoye,
Autrement ne les nommeray.
25 Ilz vont en Guerles, maint hahay
Feront crier, maint mal souffrir
Au duc cui il puist meschier,
Quant tel roy osa deffier :
La vont pour la bataille offrir.
30 ― Ja piet n’en puist il retourner. 110d
― Pourquoy ? ― Car il est bien qu’on voie,
Ne vertu : las my ! que feray ?
Pitié dort et raison larmoie,
Convoitise est en son essay,
35 Justice fault : le labour vray
Voy chascun jour prandre et cueillir,
Sanz paier poz, paelles tollir.
Fourraige appellent desrober.
Devant leur ost font tout fuir.
40 Ja pié[t] n’en puist il retourner.
Mais la chose qui plus m’anoye,
Est celle que je vous diray,
Que tuit ont de ce faire joye
Et se font vaillant en tel glay.
45 Le temps passé autrement ay
Veu guerrier sanz rien perir.
Puet estre Dieux veult tout pugnir,
Si fait les pecheurs assembler
Tous ensemble pour eulx merir.
50 Ja piet n’en puist il retourner.
L’envoy
Princes, vueilléz si advertir :
Bien paier, justice tenir,
Et voz gens d’armes contenter,
Tant que Dieux vous puist secourir,
55 Et que ce mot face fenir :
Ja piet n’en puist il retourner.
