Chançon royal 21 : Samuel fist jadis de Saul roy (CCCXXXV)
Autre Balade
Samuel fist jadis de Saul roy
Sur Israel et l’ennoint et sacra,
Dieu commandant, mais mal garda la loy.
Car contre Dieu en pluseurs poins erra.
5 L’esperit Dieu de lui se dessevra,
Et en son corps ot plaie dolereuse 110b
De l’ennemi, dont David le sena
Par le doulz son de la harpe joieuse.
Encor li fut David de plus grant foy,
10 Qui Goulias le geant surmonta.
Par Samuel l’ennoint sur Saul roy
Dieux en recoy, mais pour lors ne regna.
Adonc Saul qui de ce se doubta,
L’en hay fort de haine envieuse,
15 Non obstant [ce] que son mal appaisa
Par le doulz son de la harpe joieuse.
Par roy Saul enten ce monde et voy.
Par Samuel Dieu qui touz nous crea.
Par Israel Adam lasche de foy,
20 Et Eve aussi qui trestouz nous dampna.
Et par David qui le jaiant tua
Le filz de Dieu qui en la glorieuse
Par Gabriel Marie[1] s’aombra
Par le doulz son de la harpe joieuse.
25 Par le jaiant nostre ennemi congnoy,
Qui le monde, c’est Saul, tourmenta
Par le pechié qu’ilz commirent tuit troy :
Eve et Adam et serpent qui tempta.
D’Eva, ave : ce nom [nous] reppara
30 Et fist cesser la serpent venimeuse,
Quant Gabriel ce noble mot harpa
Par le doulz son de la harpe joieuse.
Adonc hay Saul cel aignel coy,
David fil Dieu, qui d’enfer nous getta.
35 Car li mondes li fist lors moult d’annoy,
Et de regner dessus lui se doubta.
Par mainte foiz, pour mourir, le chaça.
Mais, en mourant, destruit no mort doubteuse
Le doulz David, quant il nous restora
40 Par le doulz son de la harpe joieuse.
Princes, David nostre roy figura 110c
Et nous rendit vie par mot piteuse,
Quant Jhesucrist, filz de Dieu, nous sauva
Par le doulz son de la harpe joieuse.
[1] Saint Hilaire corrige en Marie par Gabriel
