Chançon royal 18 : Selon raison et la saincte escripture (CCCXXXII)
Autre Balade
Selon raison et la saincte escripture,
Homme piteux ne muert de cruel mort,
Mais li crueux. Puis sa desconfiture,
Et contre droit est trescruelment mort.
5 Car qui murdrist puis victoire, il a tort :
A son dessus ait de pitié memoire.
Tout homme armé doit estre par effort
Crueulx devant, piteux aprés victoire.
Quar nous sommes tous d’umaine nature,
10 Faiz et creéz d’une forme et d’un port. 109b
Se guerre avons et la desconfiture
Chiet sur autrui, qui tout tue, il se tort
De l’amour Dieu, quant il voit sanz ressort
Que du conflit a l’onnour et la gloire,
15 Espargnier doit, soit vertueus et fort,
Crueulx devant, piteus aprés victoire.
Qui autrement le fait selon droitture
A Dieu desplaist s’a cruauté s’amort[1],
Et au derrain par semblable adventure
20 Ou par pieur est occis sanz depot.
Mais li piteus plaist a Dieu et son sort :
Bonne fin a, ce devons nous tuit croire.
Or soit chascuns en ce cas, je l’acort,
Crueulx devant, piteux aprés victoire.
25 De ce avons nous en la Bible figure
De Jonathas, homme plain de confort,
Et de Judas Machabee qui dure
Bataille orent, desconfiture au fort
Des Philistins qui la furent desort.
30 Judas chaça puis la bataille voire.
Mais la voix Dieu lui cria : Esta fort,
Crueulx devant, piteus aprés victoire.
Ne se faindra ton glaive tant qu’il dure
De tous tuer tes freres ? Pitéz dort.
35 Au derrenier par ta cruel injure
Seras destruit. Lors Judas se remort
De son pechié, a Dieu fist son acort.
Plus ne chaça : par ceste vraie histoire
Doit tout princes estre, sanz desconfort,
40 Crueux devant, piteux aprés victoire.
L’envoy
Prince, en la guerre aiéz tousjours [recort] :
En commencier feréz forment dessure,
Et ne vueilléz vostre perte mescroire.
Mais au dessus ne soit vo pité fure 109c
45 Soiéz toudis, afin qu’on n’en murmure,
Crueux devant, piteus aprés victoire.
[1] Ms. sa mort
