Chançon royal 17 : O convoiteus de l’avoir de ce monde (CCCXXX)

Autre Balade[1]

                        O convoiteus de l’avoir de ce monde,
                        Que tu ne puéz un certain jour tenir,
                        Des que tu nais, la mort en toy habonde :
                        Voy que tu muers et te convient fenir,
5                      Et ne scez quant, et sur le mieulx venir
                        N’as le terme fors que de soixante ans.
                        Et si lairas les richesces mourans,
                        Ou te lairont par fortune de guerre.
                        Pour quoy veulz tu estre si acquerans ?
10                    Toy mort, n’aras fors qu .vii. piéz de terre.

                        Par convoitier voy que guerre se fonde
                        Entre les roys pour terres acquerir.
                        Le sang humain font espandre a grant onde,                                   108c
                        Les vaillans cuers et le peuple mourir,
15                    Clerc et marchans, et l’Eglise perir,
                        Crestienté, freres participans
                        De foy, de loy, un baptesme prenans,
                        Pour le vain nom d’autrui pais acquerre.
                        Desiste toy, tes freres delaissans.
20                    Toy mort, n’aras fors que .vii. piéz de terre.

                        Tu qui es faiz a l’assemblance[2] ronde
                        Du firmament et de Dieu, puéz veir
                        Que tout crea, et tout homme redunde
                        A s’ymaige : pour ce dois tu cremir
25                    De deffaire, par convoiteux desir,
                        Ce qu’il forma a ta forme semblans.
                        Car le corps mort, les esperis tremblans
                        Seulent a Dieu de toy vengence querre.
                        Se tu es bien ces choses remembrans,
30                    Toy mort, n’auras fors que .vii. piéz de terre,

                        Tu auras bien ta fosse plus parfonde,
                        Et grant tombel pour icelle couvrir,
                        Mais la convient que ton convoiter fonde,
                        Et de .vii. piéz te fault content tenir,
35                    Estre oublié et cendre devenir.
                        Ton nom pervers yert au monde manans,
                        Ton esperit aura divers tourmens.
                        Pour ses pechiéz seras mis soubz la serre
                        Des infernaulx. Es tu au monde grans ?
40                    Toy mort, n’auras fors que .vii. piéz de terre.

                        Chascuns doubter [doit][3] vie et mort seconde,
                        Et de s’ame lui doit bien souvenir,
                        Qui tousjours vit, et plustost c’une aronde
                        Du corps mortel la convient departir.
45                    Et lors la fault selon ses faiz merir
                        Ou bien ou mal, [car][4] c’est drois jugemens.
                        Roys, faictes paix, ne soiéz guerrians
                        Sur vostre loy, aléz paiens requerre,                                                108d
                        Car dire puis a chascun des tirans :
50                    Toy mort, n’auras fors que .vii. piéz de terre.

                        L’envoy

                        Prince, ou est or Oliviers et Rolans,
                        Alixandres, Charles li conquerans,
                        Artus, Cesar, Edouard d’Angleterre ?
                        Ilz sont tous mors et si furent vaillans.
55                    Et se tu es bien ce considerans,
                        Toy mort, n’auras [fors] que .vii. piéz de terre.

[1] Pièce identique au f° 114 sous le n° CCCXLV

[2] Saint Hilaire corrige en la semblance (mais le texte est identique en CCCXLV).

[3] Suppléé d’après CCCXLV

[4] Suppléé d’après CCCXLV