Chançon royal 16 : Depuis que Dieu fist terre et firmament (CCCXXIX)

Autre Balade

                        Depuis que Dieu fist terre et firmament,
                        Et qu’il crea premierement le monde,
                        Lune et souleil qui se part d’Orient,                                                  108a
                        Setemptrion, Midi, d’Occident l’onde,
5                      L’eaue, le feu, l’air et la mer parfonde,
                        Bestes, oiseaulx et tous [les] animaulx
                        Ne fut autant de pechiéz et de maulx
                        Comme j’en voy regner et advenir
                        Des plus petiz et jusques aux plus haulx.
10                    Par ce devroit tost cilz secles fenir,

                        Ou quel ne voy nul certain jugement,
                        Ne verité sur quoi homme se fonde,
                        Dieu redoubté ne justice ensement
                        Pugnir les maulx. Convoitise suronde,
15                    Qui nous laidist : toute malice habonde,
                        Qui a destruit les vertus cardinaulx.
                        Envie court. Laches sommes et maulx,
                        Et ne nous veult de pitié souvenir,
                        Des bons amer fors que les desloiaulx :
20                    Par ce devroit tost ce secles fenir.

                        Et on en voit desja l’aprouchement,
                        Dont nous sommes asséz pres de la bonde,
                        Se l’escripture et Jhesucrist ne ment :
                        Car nous veons partout a la reonde
25                    Guerre esmouvoir, que cité l’autre affonde,
                        Lune et souleil avoir divers signaulx,
                        Terre mouvoir jusques aux infernaulx,
                        Gent contre gent faire guerre et tenir,
                        Et roys enfans es regnes principaulx :
30                    Par ce devroit tost ce secle fenir.

                        Encor voit on partout generalment
                        Qu’on ne congnoist qui est vaillant et monde,
                        Qui aime Dieu, qui parle saigement.
                        Qui dit le voir, il fault qu’on le confonde,
35                    Ou qu’a engin soit gettéz ou a fonde,
                        Pour exempler autrui a telz travaulx :
                        Ne nous n’usons fors de meurs bestiaulx
                        Et du vouloir sanz raison retenir.                                                      108b
                        Pitié, amour n’avons ne que pourceaulx,
40                    Par ce devroit tost ce secle fenir.

                        Or advisons au derrain jugement,
                        Au corps mortel, de lame la faconde,
                        Et a ses maulx perpetuel tourment,
                        La mort aussi et la vie seconde,
45                    Le bon renom qui aux amis redonde
                        De leur parens, se des vices sont saufs,
                        Aprés leur mort les biens des ames d’aulx :
                        Vivre cuidons tousjours, or fault mourir,
                        Et si faisons tous crimes capitaulx !
50                    Par ce devroit tost ce secle fenir.

                        L’envoy

                        Prince, laissons ces vices generaulx
                        Et retournons aux biens especiaulx,
                        Que chascuns doit pour son ame acquerir.
                        Car, quant on laist les biens celestiaulx,
55                    Pour ces mondains qui sont vilz, vains et faulx,
                        Par ce devroit tost ce monde fenir.