Chançon royal 12 : En alant jouer a Saint Poul (CCCXXV)
Autre Balade
En alant jouer a Saint Poul,
Oy deux gens qui arguoient,
Dont l’un disoit que ceuls sont foul
Qui trop grant estat desiroient,
5 Et qui trop d’avoir acqueroient,
Et qui vont encor convoitant. 106c
L’autre dit : Pourquoy ne feroient ?
Adés fine il qui a argent.
― Non fait, car tout ne vault un chol.
10 Tost ont perdu ce qu’ilz avoient.
Par cas soudain perdent le col,
Car leurs richesces les ennoient.
Souvent mourir convoiteroient
Les saiges avoir pour tourment.
15 ― Ja chi ja, pourquoy le lairoient ?
Adés fine il qui a argent.
― Li povre chetif qui sont mol
En vostre argu vous soustendroient,
Car ne puent faire leur vol
20 Aux richesces qu’avoir vouldroient.
― Mais cent povres panduz seroient
Ains c’un riche, et mille indigent.
Prannent, hapent tuit, s’ilz m’en croient :
Adés fine il qui a argent.
25 Argent monte de l’us en sol
Ceuls qui bas et povres estoient,
Soit par leurs sens ou par leur dol,
Et pluseurs chascun jour le voient.
A Romme, a Advignon envoient,
30 Mitre et croce ont s’ilz font present.
Par povreté rien n’en aroient :
Adés fine il qui a argent.
Pour ce ne valent[1] un flajol
Povres saiges. Rien ne pourroient
35 Avoir n’acquerir. Leur aiol
Ne firent pas ce qu’ilz vouloient.
Se mains mille mars recevoient
De fin or, d’estrangiere gent,
Pour moins la moitié fineroient.
40 Adés fine il qui a argent.
Prince, au derrain ceuls s’acordoient 106d
Qui orent esté arguant.
Tous deux en la fin concluoient :
Adés fine il qui a argent.
[1] Ms. vault
