Chançon royal 11 : Vous qui vouléz parmi le monde aler (CCCXXIV)
Autre Balade
Vous[1] qui vouléz parmi le monde aler
Pour croistre honeur et querre renommee,
Dela les mons, ou pais d’oultre mer,
En divers lieus par chascune contree,
5 Quant vous aréz la terre advironnee,
Veuz les gens, eu de tous congnoissance,
Les airs, les vens et la loy ordonnee,
Tournéz toudis le bec pardevers France.
Es chaus pais ne puet aise durer
10 Homs, ne es froiz, qui n’ait courte duree.
En Italie lui fault trop endurer
Pour ce que loy n’y est pas moderee.
Force pour droit, voulentéz s’i desree,
Raison n’a lieu quant regner veult puissance.
15 Pour ce vous lo qu’a vostre retournee
Tournéz toudis le bec pardevers France.
C’est un pais tresdoulz pour demourer,
Ne froit ne chaut, ou justice est gardee.
Chascuns le sien puet tenir et garder.
20 La seignourie est sur toutes amee,
Car la loy rent a chascun sa souldee,
Grant et petit sont en equipolance,
Et puis qu’ainsi y ert raison trouvee,
Tournéz toudis le bec pardevers France.
25 En tous estas pour eulx amesurer
Y voy pluseurs faire leur demouree,
Rudes et lours, qui par y converser
Changent du tout maniere reprouvee.
L’estude y est plus qu’ailleurs honouree,
30 Les gens y ont toute belle ordonnance,
L’air y est doulz, et quant la terre agree,
Tournéz toudis le bec pardevers France.
La vous devéz pour vivre acheminer,
La est honeur et vaillance esprouvee,
35 La est la court du [grant] roy qui n’a per,
De tous deduis, de richesce paree,
Et de tous biens est la terre peuplee.
La des subgiéz est vraie obeissance,
Et quant peuples la nul temps ne s’effree
40 Tournéz toudis le bec pardevers France.
L’envoy
Vous qui vouléz en paix vivre et regner,
Estre enrrichi, avoir honeur, science,
Et noblement au monde gouverner,
Tournéz toudis le bec pardevers France.
[1] Ms. Lous
