Chançon royal 13 : Ainsis qu’om voit geline par nature (CCCXXVI)

Balade

                        Ainsis qu’om voit geline par nature
                        Soy doulouser et garder ses poucins
                        Tant de huas comme de la froidure,
                        Soubz ses eles les a enclos et sins
5                      Souventefois, et leur quiert a manger,
                        Afin que nulz ne chiee en grant danger.
                        Doit[1] tous princes qui maine gens en guerre
                        Semblablement son ost avitaillier,
                        Et si leur doit toute seurté querre.

10                    En temps d’esté qu’om treuve la verdure
                        Pour bestail[le], pour chevaulx et roncins.
                        Que jours sont granz, la chalour par mesure,
                        Les courtes nuis et les souefs matins.
                        Que la pluie ne peut gaire[2] empeschier,
15                    Et qu’on treuve fruiz asséz pour mangier
                        Tant es arbres comme es labours de terre,
                        En tel temps doit prince ses gens guier,
                        Et si leur doit toute seurté[3] querre.

                        Pas ne les doit mener a l’aventure,
20                    N’en les menant destruire ses voisins,
                        Ains de sçavoir doit mettre paine et cure
                        De l’autrui [ost] son fait et ses affins,
                        Et en quel lieu les pourra dommagier.
                        Et s’il veult lors ville ou fort assiegier,
25                    Soit en juillet ou aoust : car cilz erre
                        Qui en yver fait gens aux champs logier,
                        Et si leur doit toute seurté[4] querre.

                        Car le temps est lors plains de pourreture,
                        Froit et boueux. On n’a vivres ne vins,                                              107a
30                    Les nuis sont grans, chevaulx sont en l’ordure.
                        A retourner est lors chascuns enclins,
                        On ne treuve [terrain] ou fourragier.
                        C’est tout retrait. Ceuls des chasteauls sont fier,
                        Qui ont bien sceu gens et vivres acquerre.
35                    Prince[5] a ses gens doit bien sur ce advisier.
                        Et si leur doit toute seurté[6] querre.

                        Et en son ost face garder droiture,
                        Et escouter tousjours sur les chemins.
                        Qu’on soit arméz tant comme la nuit dure.
40                    Qu’on ait grant guet et qu’om ne soit enclins
                        A faire assault sanz ses engins drecier.
                        Qu’om ne face ses gens d’armes blecier,
                        Jusqu’il y ait rompu ou mur ou serre.
                        Ainsis princes doit ses hommes aisier,
45                    Et si leur doit toute seurté[7] querre.

                        L’envoy

                        Princes, qui veult les grans [fais] esploittier
                        De ses gens doit comme de soy guettier.
                        Vivres et temps doit convenable [en]querre.
                        Et si se doit aux vaillans conseillier,
50                    Croire leurs sens sanz ses gens exillier[8],
                        Et si leur doit toute seurté[9] querre.

[1] Ms. Donc

[2] Ms. gaires

[3] Ms. seureté

[4] Ms. seureté

[5] Ms. Princes

[6] Ms. seureté

[7] Ms. seureté

[8] Ms. exilliéz

[9] Ms. seureté