Chançon royal 8 : Trop me merveil de creature humaine (CCCXXI)
Autre Balade
Trop me merveil de creature humaine, 105a
Qui toudis court et ne puet demourer
Que son desir a la mort ne la maine.
De jour en jour n’y fait que labourer.
5 Chascuns quiert le droit chemin
Et se haste pour abregier sa fin,
Car toute rien qui naist sur mort se fonde.
Les gens ne sont que mortel pelerin,
Tuit sommes faiz trespassans par ce monde.
10 Et chascuns voit que c’est chose certaine,
Si ne me fault pas grans preuves trouver,
Car quant homs naist, il crie pour la paine
Et la dolour qu’il lui fault endurer.
Et si tost qu’il a engin,
15 La nuit requiert et puisqu’il soit matin,
Qu’ivers s’en voist et que l’esté redunde,
Panthecouste, Nouel, la Saint Martin :
Tuit sommes faiz trespassans par ce monde.
Heritaige certain ne vray demaine
20 N’y puet nulz homs acquerir ne garder
Heure, moment, jours, mois, ans ne sepmaine,
Qui soit vray sien, qu’on ne lui puist oster.
Tout est a Fortune enclin
Et tout se pert par force et par hutin
25 Ou chascun jour […][1]
Et par la mort es choses ne divin :
Tuit sommes faiz trespassans par ce monde.
Au mieulx venir, nostre vie mondaine
A .lx. ans, pou puet oultre passer.
30 Dont .xx. ans sont en jeunesce soudaine.
Vint ans avons pour avoir amasser,
Dix ans regnons enterin,
Autres .x. ans languereux, orphenin,
Vieulx, decrepiz. Mort nous met en sa fonde.
35 L’umeur deffault et nous cheent li crin :
Tuit sommes faiz trespassans par ce monde. 105b
Ainsis courons ceste vie incertaine
Ou nous sommes tuit fait pour trespasser
Comme l’en voit. Mais vie souveraine
40 Doit l’ame avoir et la perpetuer.
Or en soions tuit affin
Et la querons d’amoureus cuer et fin
En delaissant l’autre ou perilz habonde,
Car, selon loy hebree et en latin,
45 Tuit sommes faiz trespassans par ce monde.
L’envoy
Princes, chascuns doit a la fin penser :
(De son aage ne puet nulz passer bonde)
Faire le bien et le mal eschiver :
Tuit sommes faiz trespassans par ce monde.
[1] Vers laissé inachevé
