Chançon royal 6 : Quel nature ont les richesces mondaines (CCCXIX)

Autre Balade

                        Quel nature ont les richesces mondaines,                                       104a
                        Ne quel pouoir ont li prince mondain ?
                        Les richesces sont laides et villaines
                        Quant elles font un noble cuer villain.
5                      Li grant seigneur et li plus souverain,
                        Quel force ont ilz, quel vie et seurté ?
                        Plus seurs vit povres en povreté,
                        Aise de cuer, sains des membres du corps,
                        Que roys ne fait, tristes en sa plenté.
10                    Souffisance est un tresriches tresors.

                        Par richesces sont les pensees vaines,
                        Qui les hardis font couars tout a plain.
                        Cilz qui devant aloit seurs par les plaines
                        Pour eulx [souvent] a le cuer foible et vain,
15                    Et sanz elles l’ot de prouesce plain.
                        En tel paour l’ont richesces bouté
                        Que perdre craint ce qu’il a conquesté :
                        Ainsis est mis de son noble sens hors
                        Et au dessoubz de sa felicité.
20                    Souffisance est un tresriches tresors.

                        Telz richesces ne sont bonnes ne saines,
                        Et bien y pert, car il est vray certain
                        Qu’aux plus mauvais vont pour eulx donner paines :
                        Si est saiges qui en oste sa main.
25                    Elles tuent homme d’uy a demain
                        En ame, en corps par leur chetiveté.
                        En Boece est plus a plain recité
                        Que convoitise est lais vices et ors
                        Dont ce monde est destruit et tourmenté.
30                    Suffisance est un tresriches tresors.

                        Les hauls princes qui ont les granz demaines
                        Et leurs subgiéz ne sont pas li plus sain :
                        Mains pensers ont et doubtes incertaines
                        Qui leur puelent venir par cas soudain
35                    De leurs subgiéz, et s’ilz ont cuer hautain,
                        En exercent toute crudelité.
                        Quel puissance ont, comme il soit verité                                         104c
                        C’un autre en eulx puet exercer ses tors
                        Semblablement, et lors sont rebouté ?
40                    Souffisance est uns tresriches tresors,

                        Qui jadis fist regner les gens rommaines.
                        Puis perdirent, quant ilz prindrent le train[1]
                        De convoitier par leurs vies haultaines.
                        L’eglise en est divisee, s’en plain.
45                    Flandres aussi en est mise a l’estrain,
                        Espaingne en a changié sa royauté
                        Et Barnabo en fut desherité.
                        Prince ne puet sanz raison estre fors.
                        Soyons piteus, fuions iniquité.
50                    Souffisance[2] est un tresriches tresors.

                        L’envoy

                        Princes, les roys fondéz sur equité,
                        Qui dobtent Dieu et aiment verité,
                        Gardans raison et justice a effors,
                        Leurs royaumes ont perpetuité,
55                    Les autres non. Cy dit l’auctorité :
                        Souffisance est un tresriches tresors.

[1] Ms. frain

[2] Saint Hilaire corrige en Souffisance