Chançon royal 4 : Que vault preschier au sourt qui goute n’oit (CCCXVII)
Autre Balade
Que vault preschier au sourt qui goute n’oit ? 103c
Que vault semer sur pierre le froument ?
Que vault monstrer a cellui qui ne voit ?
Que vault le lire a cellui qui n’apprant ?
5 Que vault enter sur tron qui ne reprant ?
Cilz pert son temps qui tele euvre pourchace,
Combien qu’aucuns dient communement :
C’est trop bien dit, mais queréz qui le face.
Cilz qui bien scet et mal fait se deçoit
10 Et prandra mal a son definement.
Et aussi fait cilz qui le bien dire oit,
Quant il n’en vient a nul amendement.
Deceuz sont trop merveilleusement
Ceuls qui ainsi quierent mondaine grace.
15 Mieulx leur vausist querir leur sauvement.
― C’est trop bien dit, mais queréz qui le face.
Que vault li homs qui autrui mal perçoit
Et ne voit pas son propre encombrement,
Et qui en lui pour son preu ne conçoit
20 La parole de bon entendement ?
Autant vauldroit oir venter le vent.
Car telz gens ont toudis un pié sur glace,
Qui se muent de moment en moment.
― C’est trop bien dit, mais queréz qui le face.
25 Par le prescheur[1] entens justice et droit
Que l’en doit faire a tous generalment.
Par la pierre qui nul fruit ne reçoit
Les mauvais cuers de ce monde present,
Et par le grain le bon dit du preschant,
30 Et par le sourt cil qui tourne sa face,
Par l’aveugle le mal gouvernement :
C’est trop bien dit, mais queréz qui le face.
Par le liseur cil qui ne se congnoit,
Par le viéz tronc cuer plus dur d’aymant,
35 Et par l’ente, douçour qu’om esperoit,
Que le bois sec destruit et va seichant.
Or y pensons, las, dolereus, meschant, 103d
Qu’a paine voy nul qui ne se mefface,
Et nous deusson tuit vivre sainctement.
40 ― C’est trop bien dit, mais queréz qui le face.
L’envoy
Prince, au jour d’ui est tel gouvernement
Que li menteur et li dissimulant
Ont tous les biens et du monde la grace,
Et li bon sont vil, povre et indigent,
45 Que l’en deust amer sur toute gent.
C’est trop bien dit, mais queréz qui le face.
[1] Ms. prescheurs
