Chançon royal 3 : A nobles mois, peres de Zephirus (CCCXVI)
Balade
O nobles mois, peres de Zephirus,
Oncles Juno[1] et frere de Pallas,
Cousins germains la dieu[e]sse Venus,
Qui tant de filz et [tant] de filles as,
5 Tu es premiers qui par amours amas
Et qui au bois donnas toute verdure,
Fueilles et flours, et la terre honouras :
Amer te doit pour ce toute nature.
O tresdoulz may, a genoiz te salus,
10 Mon cuer te doing et tout mon corps aras,
Car en toy sont trestoutes les vertus
Amoureuses, en toy n’a que soulas.
Es autres moys disent aucuns : helas !
Par leur durté. Mais toute creature 103b
15 Prant reconfort ou temps que tu donnas :
Amer te doit pour ce toute nature.
Tu faiz aler sanz froidure les nus,
Les malhetiéz de l’iver respassas,
Et les gouteus as tu remis dessus,
20 Les mehaingniéz de jambes et de bras :
Tuit sont gari, et par tout ou tu vas
Bestes et gens pais de douce pasture[2]
Et a tousjours leesce leur donnas :
Amer te doit pour ce toute nature.
25 Tu resjouis vieulz, jeunes et chanus.
A ton venir t’encline chascuns bas.
Tu faiz amer granz, riches et menus,
Bestes, oiseauls sont tuit prins en tes las.
D’eulx conjoir, de nigier ne sont las,
30 De faire fruit chascun a sa droiture,
De hault chanter : tel pouoir leur baillas.
Amer te doit pour ce toute nature.
Par ton fait est li mondes soustenus,
Tout naist par toy, qui ainsi l’ordonnas,
35 Et de toy sont maint grant peuple venus.
Chascun te suit et te quiert pas pour pas.
A toy me rens, ne me refuse pas.
A ton saint jour me donne nourreture
De douce amour, dont tu es advocas :
40 Amer te doit pour ce toute nature.
L’envoy
Princes des moys, li plus gais, li plus drus,
Li plus jolis et li plus chiers tenus,
A qui tous roys font honeur sanz mesure,
Je te suppli que soie retenus.
45 Pouoir en as, de touz es vrais escus :
Amer te doit pour ce toute nature.
[1] Ms. et Juno
[2] Ms. la douce pasture
