Chançon royal 2 : En retournant d’une court souveraine (CCCXV)

                        En retournant d’une court souveraine                                              102d
                        Ou j’avoie longuement sejourné,
                        En un bosquet, dessus une fontaine,
                        Trouvay Robin le franc, enchapelé,
5                      Chapeauls de flours avoit cilz afublé
                        Dessus son chief, et Marion sa drue.
                        Pain et civoz l’un et l’autre mangue :
                        A un gomer puisent l’eaue parfonde.
                        Et en buvant dist lors Robins qui sue :
10                    J’ay Franc vouloir, le seigneur de ce monde.

                        Hé ! Marion, que nostre vie est saine !
                        Et si sommes de tresbonne heure né :
                        Nul mal n’avons qui le corps nous mehaigne.
                        Dieux nous a bien en ce monde ordonné.
15                    Car l’air des champs nous est habandonné.
                        A bois couper quant je vueil m’esvertue.
                        De mes bras vif. je ne robe ne tue.
                        Seurs chante. je m’esbas a ma fonde.
                        Par moy a Dieu doit grace estre rendue[1] :
20                    J’ai Franc Vouloir, le seigneur de ce monde.

                        Tu puéz filer chascun jour lin ou laine,
                        Et franchement vivre de ton filé,
                        Ou en faire gros draps de tiretaine
                        Pour nous vestir, se no draps sont usé.
25                    Nous ne sommes d’omme nul habusé,
                        Car Envie sur nous ne mort ne rue.
                        De noz avoirs n’est pas grant plait en rue,
                        Ne pour larrons n’est droiz que me reponde.
                        Il me suffist de couchier en ma mue.
30                    J’ay Franc Vouloir, le seigneur de ce monde.

                        Juge ne craim qui me puist faire paine
                        Selon raison : je n’ay rien offensé.
                        Je t’aime fort, tu moy d’amour certaine.
                        Pas ne doubte que soie empoisonné.
35                    Tirant ne craing : je ne sçay homme armé
                        Qui me peust oster une laitue.
                        Paour n’ay pas que mon estat se mue :                                            103a
                        Aussi frans vif comme fait une aronde.
                        De vivre ainsi mon cuer ne se remue.
40                    J’ay Franc Vouloir, le seigneur de ce monde.

                        Dieux ! qu’a ces cours ont de dueil et de paine
                        Ces curiaux qui dedenz sont bouté !
                        Je l’apperceu trop bien l’autre sepmaine,
                        C’un fais de bois avoie la porté.
45                    Ilz sont tous sers : ce n’ay je pas esté.
                        Mangier leur vi pis que viande crue.
                        Ilz mourront tost, et ma vie est creue,
                        Car sanz excés est suffisant et ronde.
                        Plus aise homme n’a dessoubz ciel et nue :
50                    J’ay Franc Vouloir, le seigneur de ce monde.

                        L’envoy

                        Prince, quant j’eu franc Robin escouté,
                        Advis me fut qu’il disoit verité :
                        En moy jugié sa vie belle et monde,
                        Veu tous les poins qu’il avoit recité.
55                    Saige[2] est donc cilz gardans l’auctorité :
                        J’ay Franc Vouloir, le seigneur de ce monde.

[1] Ms. grace doit estre rendue

[2] Ms. Saiges