Chançon royal 1 : Charongne a vers, fiens pourris et ors (CCLXXIV)

Autre Balade comment nostre povre charongne est orde et vile, viande a vers

                        Charongne a vers, fiens pourris et ors,
                        Arbres chargiéz de toute pourreture,
                        Delicieus, convoiteus en tresors,
                        Garnis de poulz, de lentes et d’ordure,
5                      Pissat, crachat, portes de ta nature,
                        Sanz bonne odeur c’on puisse en toi trouver.
                        Tu ne te doiz aux bestes comparer,
                        Car laine et cuir, let, os, et char et fiens
                        A vie et mort puet d’elles profiter.
10                    Mais vis ne mors tu ne puéz valoir riens.

                        Tresmalheureus, orgueilleus, povres corps,
                        Qui est conceus en puour de luxure,
                        Nourris dedenz, quan qu’il soit du dehors,
                        De sang manstru, treshorrible pasture,
15                    Chiens en muerent, terre en pert sa verdure,
                        Et en naissant commences a plourer.
                        D’une orde pel te fault desveloper,
                        En chaude eaue laver toy et les tiens.
                        Autre animal sont bien a reprouver,
20                    Mais vis ne mors tu ne puéz valoir riens.

                        Et qui pis est, ja ne seras si fors,
                        Si grans, si biaus, de si noble estature,
                        De si grant sens ne richesce, que Mors
                        Ne te mette dessoubz sa couverture.
25                    Pare toy fort, chetive creature !
                        Hui te voit on comme Roy couronner,
                        Demain mourir et en cendre tourner.
                        Chetis seras, se tu n’as fait des biens                                                 59c
                        Pour moy, qui puis tous temps vivre et durer.
30                    Mais vis ne mors tu ne puéz valoir riens.

                        Ton ame sui, je te fais tous confors,
                        Aler, parler, entendre par mesure.
                        Mais contre moy est orgueilleus et fors,
                        Et me maines partout a l’aventure,
35                    Es grans pechiéz et deliz, en l’ardure
                        Des biens mondains, pour moy faire dempner
                        Et a tousjours aux enfers condempner,
                        En delaissant les biens celestiens.
                        Je doy valoir, si je vueil Dieu amer.
40                    Mais vis ne mors tu ne puéz valoir riens.

                        Quant tu deusses parler a Dieu, tu dors.
                        Ne te souvient pas de ta sepulture,
                        Fors de manger et d’acquerir les ors
                        Mauvaisement, ne tu n’as de moy cure.
45                    Laisse t’erreur. Sui la saincte Escripture.
                        Vueilles ton cuer a bien faire encliner.
                        Par quoy, toy mort, je puisse recliner
                        Au derrain jour avec toy qui es miens :
                        Ainsi pourras par moy vivre et regner.
50                    Mais vis ne mors tu ne puéz valoir riens.

                        L’envoy

                        Cors dolereus, vueilles toy ordonner
                        A mon vouloir, sanz moy suspediter,
                        Et tu aras Paradis, se te tiens
                        Avec[ques] moy, a ton ressusciter.
51                    Et se ce non, enfer nous fault porter.
                        Mais vis ne mors tu ne puéz valoir riens.