Chançon baladee 4 : Moult a l’omme foul couraige (MCXIV)
Chançon baladee
Moult a l’omme foul couraige
Qui enrraige
D’autrui bien qui ne lui nuit,
Et qui est liéz du dommaige
5 D’omme saige.
Par envie, jour et nuit,
Art son corps, s’ame[1] destruit
Et si n’en puet moins valoir 295c
En pouoir
10 N’en sçavoir
Vilz qui convoiteux envie.
Si puet chascuns percevoir,
Et c’est voir,
Que male chose est Envie ?
15 Nee de mauvais linaige
Et umbraige
Ou feux[2] d’avarice bruit,
D’ypocrisie a l’ymaige
Et l’ommaige
20 De Faulx Semblant qui trop nuit,
Quant ceulx qu’elle blandist cuit
Et veult par sa gueule ardoir,
Main et soir,
Du feu noir
25 Qui lui abrege la vie
Par son perilleux vouloir,
Dont j’espoir
Que male chose est Envie.
A traison de paraige
30 S’aparaige,
Car nul temps ne prant deduit[3]
Fors en haineux ouvraige
Et oultraige
Pour faire riote et bruit
35 Aux bons. Mais homme bien duit
La doit mettre en non chaloir
Et sçavoir
Que son hoir
Est fole merancolie,
40 Qui monstre et fait apparoir
Par veoir
Que male chose est Envie. 295d
[1] Ms. et same
[2] Saint Hilaire corrige en feu
[3] Écrit en deux vers dans le ms.