Chançon baladee 5 : Douce saison tost passee (MCXVIII)
Chançon baladee
Douce saison tost passee,
En jeusne temps desiree
Par plaisant folour
Des foulz appellee Amour,
5 Nulz saiges a vous ne bee.
Dont puet venir tele ardour
Et doulour
Chascun jour
A jeunesce la dervee ?
10 Ce fait la fresche coulour
Et l’odour
De la flour
Qui est par l’œil regardee.
Et lors vient fole pensee,
15 De grant desir embrasee, 296d
En tristesce et plour,
Qui n’a repos ne sejour
Mais vi com desesperee.
Douce saison tost passee.
20 Maint souspir, mainte clamour,
Maint labour
En destour
Fait Dangier a la volee,
Souffrir froidure et chalour
25 Et cremour
Par baudour
De fole plaisance nee.
Et quant tele amour donnee
Est, raison consideree,
30 N’est pas le meillour,
Car ame, corps et vigour
En ont monrt determinee.
Douce saison, [tost passee][1].
Puis vient villesce a son tour
35 De sa tour,
Et tristour
Recorde la vie usee,
Qui donne une grant paour
Et freour
40 En langour
Que l’ame ne soit dampgnee.
Adieu, douce, mal nommee,
Saison, folement amee,
L’ardent feu du four
45 D’oultrecuidance et d’errour,
Ou j’ay jeunesce gastee.
Douce saison tost passee[2], etc.
[1] Saint Hilaire ne rétablit pas le refrain.
[2] Ms. desiree