Chançon baladee 3 : Adviséz tuit a ma dolour (MLV)
Autre chançon baladee
Adviséz tuit a ma dolour,
Adviséz mon dueil et mon plour,
Adviséz ma dure langour.
Car il fut un temps que je vy
5 Honeur, leesce, amour aussi,
Loyaulté, bonne compaignie,
Et ceuls qui orent bien servi,
Estre honouréz et remeri
Ou fait de l’amoureuse vie.
10 Lors regnoit secret et cremour,
Justice, loy, pité, douçour,
Joustes, festes, voyage, glay,
Mais au jour d’uy ne court qu’esmay,
Menterie, ordure et tristour.
15 Adviséz tuit a ma dolour !
Avarice a les cuers ravi
Et fole plaisance avec lui
En l’estat de chevalerie, 278d
Les cuers des clers enseveli
20 Es pechiéz du peuple autressi,
Car toute vertu se varie.
On n’aime nul qui vueille honour,
En haine est changee amour,
Remuneracion ne sçay,
25 Les mauvés qui font le hahay
Gouvernent chascuns a son tour.
Adviséz tuit a ma dolour !
Nulz n’a ce qu’il a desservi,
Bons le bien, li mauvais pugni
30 Ne sont, tout va par flaterie.
Saiges ne sera point oy
Ne nul prodomme conjoy.
Baras couvers et tricherie
Et menteur regnent nuit et jour,
35 En ce monde font leur sejour.
Je muir de deuil, las ! que feray ?
Vengence a Dieu demanderay,
Et se vous n’y sçavéz meillour,
Adviséz tuit a ma dolour.