Chançon baladee 2 : Je n’ay leesce ne confort (MLIV)
Chançon baladee
Je n’ay leesce ne confort,
Je n’ay joye n’esbatement
Je n’ay fors tristesce et tourment
Et espoir de tout desconfort,
5 Je languis doleureusement.
J’ay le cuer plus noir qu’errement,
J’ay toute fortune a effort,
Je voy par tout desloyaument
Amour changier et faussement,
10 Sanz amis et sanz reconfort,
Je voy Dieu faindre et jugier Tort,
Qui ay servi tresloyaument
Ma dame, qui presentement
Me het et desjoie[1] ma mort.
15 Je n’ay leesce ne confort.
Fortune, debonnairement
M’enyvras, au commencement,
De l’amour qui me print trop fort
Sanz regarder ton changement.
20 Puis m’as tourné soudainement
Ta roe, et mené a dur port,
Fait sentir ton doleureux sort
Et plus de mal en un moment
Que je n’ay eu de joye en cent.
25 Cesse donc sur moy ton effort.
Je n’ay leesce ne confort. 278c
Et puisqu’Amour m’a telement
Navré, par toy le jugement
Requier au Dieu d’Amours qui dort :
30 Se je languiray longuement,
Ou se j’auray alegement,
Ou se le mauvais qui se tort
Joira de m’amour sanz ressort.
Car se l’oy amoureusement,
35 Comme je voy communement,
Amour et Loyauté m’ont mort :
Je n’ay leesce ne confort.
[1] Saint Hilaire corrige en desire
