Balade 1012 : Le temps vient de purgacion (MCCCCXCI)

Balade [454a] comment les excés et convoitise de trop mangier et prandre les biens mondains sont a doubter

                        Le temps vient de purgacion
                        A pluseurs qui sont trop replect
                        De mauvaise replection,
                        Pour les grans exés qu’ilz ont fet.
5                      C’est ce qui nature deffet
                        De trop et ce qu’en ne doit prandre.
                        Pour ce les fault purgier de fect :
                        Qui trop prant, mourir fault ou rendre.
                       
                        Car par la delectacion
10                    De trop prandre sont maint infet
                        Viande de corrupcion,
                        Qu’om prant par couraige imparfect.
                        Trop couvoiteus par ce meffet,
                        La grief maladie ou corps entre,
15                    Dont maint homme ont esté deffait.
                        Qui trop prant, mourir fault ou rendre.
                       
                        Lors couvient avoir pocion
                        Pour les maulx vuider, qui sont blet,
                        Souffrir mal, paine et passion
20                    Qu’om a par sa folie attret.
                        Ceuls qui ont trop d’argent retret,
                        N’aront pas phisicien tendre,
                        Mais dur, qui fera chascu nent :
                        Qui trop prant, mourir fault ou rendre.
                       
                        L’envoy
                       
25                    Princes, cellui n’est pas preudom
                        Qui tout veult bouter en son ventre.
                        Au derrain en a dur guerdon :
                        Qui trop prant, mourir fault ou rendre.