Balade 1013 : Six manieres sont de baillis (MCCCCXCII)

Balade [454b] comment ilz sont .vi. manieres de baillis

                        Six manieres sont de baillis
                        Dont l’un est baillis bailliens,
                        Qui se fait craindre a ses subgis
                        Et redoubter de pluseurs gens,
5                      Qui prant qu’i puet puis hors, puis ens,
                        Et use de sa voulenté
                        Plus que de droit ne d’equité.
                        Autre bailli y a qui baille,
                        Afin que son fait soit porté :
10                    Chascuns pour avoir se travaille.
                       
                        Il y a baillis endormis,
                        Simples et po entreprenens,
                        Qui ne sont saiges ne cremis :
                        A dissimuler passent temps.
15                    Autres baillis sont plus constens,
                        Qui trop et po faire ont tempté.
                        Du moien se sont contempté,
                        Et guettent qu’om ne les assaille :
                        Maint pour prandre ont été hurté,
20                    Chascun pour avoir se travaille.
                       
                        Or en y a de si chetis
                        Qu’ilz n’ont que bouter en leurs dens.
                        Ilz baillent bien .ix. fois ou dix,
                        Et si n’ont que mettre dedens.
25                    Baillis y a saiges de sens,
                        Grans clers qui ont l’auctorité
                        Autre, a qui on a presenté
                        Or, argent, vaisselle et aumaille,
                        Qu’il a tout en son sac bouté :
30                    Chascun pour avoir se travaille.
                        L’envoy
                        […][1]

[1] Vers manquants