Balade 1011 : Pour le salut de la Crestienté (MCCCCXC)
Balade du grant pardon de romme qui fut et commença l’an mil.ccc..iiiixx. dix et neuf, fenissent a noel mil quatre cens.
[1399-1400]
Pour[1] le salut de la Crestienté
Et acquerir aux ames sauvement
De tout le peuple, tant ait pecheur esté,
Remission fait le pappe Clement
5 De paine et coulpe a tous generalment
De leurs pechiéz, qui par devocion 453d
Visiteront en bonne entencion,
Et qui yront de vray cuer, femme et homme,
D’or en avant pour avoir plain pardon
10 De cinquante ans en cinquante ans a Romme.
Qui par avant et d’ancienneté
Fut a cent ans, mais pour l’abregement
De nostre aage et la fragilité,
L’a acourcy par le consentement
15 Des cardinaulx et l’admonnestement
D’aucuns Rommains. En sus ce vision
Deux foiz de Dieu, fist la restrinction,
Pour allegier de noz pechiéz la somme,
En voyagent, pour l’absolucion,
20 De .l. ans en .l. ans a Romme.
Ouquel pardon de grant auctorité,
Ou tous pechiéz sont lavéz telement
Que, qui se part de bonne voulenté
Pour l’acquerir de son lieu seulement,
25 S’il muet, il est sauvéz certainement,
Soit seculier ou de religion.
Et d’y aler fait dispensacion
A tout Ordre, car tous les droiz consomme
Pour nostre bien et no salvacion,
30 De .l. ans en .l. a Romme.
L’envoy
O glorieus Dieux, saincte Trinité,
Donne nous cuer par ta doulce pité
D’aler au lieu ou Pierre[2] et Polz se nomme
Et aux Corps Sains qui la sont martiré,
35 Pour le pardon qui est la declaré
De .l. ans en .l. ans a Romme.
[1] Ms. Sour
[2] Ms. pierres
