Balade 1008 : Je souloie en jeunesce ouvrer (MCCCCLXXXVII)
Balade des hommes anciens regretans leur pouoir de forgier perdu par vieillesse
Je souloie en jeunesce ouvrer
En la forge dame Nature,
Des martiaulx ferir et frapper
Chascun jour tant que pouoir dure :
5 Enclume n’y avoit si dure
Qui ne flechist soubz mes martiaulx.
J’anprains lors en pluseurs vaisseaulx,
Et forgay diverss empraintes,
Mais le feu m’a sechié les piaulx :
10 Toutes mes forces sont estaintes.
Ce m’a fait le continuer
De forgier, la paine et la cure
En divers lieux, pour moy oster
Mon pouoir qui se desnature.
15 Et bien sçay qu’il n’est creature
Ne homme juene, tant soit biaux,
Fors, appers, jolis et nouviaux,
Qu’en forgent n’ait de doleurs maintes. 453a
J’en suis vraiz tesmoings et loyaulx :
20 Toutes mes forces sont estaintes.
Car je ne puis martel lever,
Pour les exces et pour l’ardure
Que j’ay eu de trop marteler
En jeune temps, prins m’a froidure.
25 Nulz ne scet les maulx que j’endure,
Ne frapez[1] sur les enclumiaux
Tant com j’ay fait, doulz jouvenciaux.
Par moy vous sont figures paintes
D’eschuer les ardans fourniaux :
30 Toutes mes forces sont estaintes.
L’envoy
Princes, je suis en adventure,
Par default de garder mesure,
De requerir Dieu, sains et saintes
Que la mort ne me queure seure.
35 Ma vie en voy en adventure :
Toutes mes forces sont estaintes.
[1] Ms. fraper
