Balade 999 : Vous qui vouléz a droit estre servis (MCCCCLXXVI)
Balade pour congnoistre les bons servens 449d
Vous qui vouléz a droit estre servis
Et congnoistre [qui sont] les bons servens,
Prenéz varlés de bon lieu touz apris,
Qui ne soient bejaunes ne enfens,
5 Humbles de cuer et dottrine souffrens,
Et qui soient de leur meffait honteux,
Servissables, diligens, cremeteux,
Et qui doubtent rencheoir en leur vice,
Sobres en tout, loyaulx et vertueux :
10 De telz est bon, d’autres non, le service.
Adjoint encor qu’aient esté nourris
[…][1]
En paine avoir et non pas en delis,
Qu’ilz ne soient glouz, joueurs ne parlens,
15 Mais tousjours prest pour le maistre et veillens,
Si c’om se puist du sien attendre a eulx,
Qu’ilz ne soient fetart, lent, pareceux,
Mais en tous cas a leur maistre propice,
Doulz, paciens, sanz estre rumoreux :
20 De telz est bon, d’autres non, le service,
Comme d’enfans qu’il fault estre aprentis,
Riens ne scevent, c’est merveilleus tourmens,
Ou de varléz a moines noirs ou gris
Ou a prelas en un lieu residens,
25 Haultains de cuer : fuiéz contre telz gens,
Taverneréz, de vivre dangereux,
Qui reppliquent et qui sont orgueilleux.
Gardéz les bons qui bien font leur office,
Obeissans a leur maistre et doubteux :
30 De telz est bon, d’autres non, le service.
L’envoy
Princes, varléz debonnaires, soingneux, 450a
Bien besongnans, non querrans estre oiseux,
Doit estre amé, mais qu’il ne s’orguelisse,
Et qui trover pourra aucuns d’iceulx,
35 Retiengne les, il en sera cureux :
De telz est bon, d’autres non, le service.
[1] Vers manquant
