Balade 998 : Vieulx serviteurs et anciens (MCCCCLXXV)
Balade des vieulx serviteurs de la court et de leur boute hors
Vieulx serviteurs et anciens,
Qui trop avéz suy ma court,
Vuidier vous fault hors de ciens, 449c
Car paresceux estes et lourt,
5 Chargant, dormant, annuyant, sourt,
Qui ne pouéz plus traveillier.
Repos vous a [tres]grant mestier,
De retraire est temps et saison.
Quant plus ne vous pouéz aidier,
10 Aléz vous ent en vo maison.
J’ay mis en oubli touz voz biens
Quant fruit fault, et Jeunesce acourt
Avec Plaisir qui est des siens,
Hardi Parler, qui scet du hourt.
15 Ceulx font la guerre et le bouhourt
A Vieillesce que n’ay pas chier.
Mes biens vous vueil lors reprochier.
Par eulx en ay grant achoison :
Quant ne le faictes que chargier,
20 Aléz vous ent en vo maison.
Vieulx barbiers, vieulx phisiciens,
Vieulx menestrelz qui estes gourt,
Vieulx queux, vous ne valéz plus riens.
Viel maistre d’ostel qui decourt,
25 Viel chappellain qui ne se sourt,
Viel chambellain, viel chevalier,
Viel eschançon, viel pannetier,
Vieil secretaire et, si dit on,
Descuirie vieil escuier,
30 Aléz vous ent en vo maison.
L’envoy
Princes, la court fait publier
Aux jeunes gens pour adviser
D’acquerir avoir par raison
Pour leur vieillesce soulacier,
35 Pour doubte de ce mot derrier :
Aléz vous ent en vo maison.
