Balade 991 : Tousjours tourne le firmament (MCCCCLXVIII)

Balade de moralité et philosophie sur la mutacion des temps et des meurs de gens

                        Tousjours tourne le firmament
                        Aourné de ses sept planetes,
                        De son Zodiaque ensement,
                        Des cercles et choses parfectes,
5                      Des douze signes, la sont fectes
                        Les diverses conjunctions
                        Des planettes, leurs actions
                        De bien en mal et le contraire
                        Par maintes opposicions,
10                    Et selon ce, fault le temps faire.
                       
                        Or y sont ly quatre element,
                        Complections .iiii. imparfaictes.
                        .Iiii. temps et leur changement
                        D’eure a ja. Puis viennent comettes
15                    Apparens, faultes et disettes
                        De biens, froiz, inundacions,
                        Chaleurs, mors, guerre[1], oppressions
                        De peuples, plenté ordinaire
                        De vins, de chars et de poissons.
20                    Et selon ce, fault le temps faire.                                                        447d
                       
                        Nous avons aussis orient,
                        Midi et ses parties nettes,
                        Septemtrion et occident,
                        Qui possedent diverses sectes,
25                    Dont chascune ont a soy atrectes
                        Grant seignourie et regions
                        Par maintes revolucions,
                        Selon les cours de ciel, qui traire
                        Veult aux premieres mocions.
30                    Et selon ce, fault le temps faire.
                       
                        L’envoy
                       
                        Princes, tous cilz firmamens rons
                        En tournant a donné ses dons
                        A chascun temps universaire,
                        Les uns mauvais, les autres bons.
35                    Toutes noz qualitéz changons,
                        Et selon ce, fault le temps faire.

[1] Ms. guerres